Dili, 06 Fevereiru 2025 (Média Democracia) – Boxista Timor-oan na’in rua ne’ebé delega husi El-Matador Boxing Club sei partisipa “Eventu How Sport Fight Night Season Five” iha Indonesia Bali iha loron 09 fulan Fevereiru tinan ne’e.
Tuir Treinadór Prinsipál El-Matadór Boxing Club Abilio Orlando dos Santos hateten, liuhusi oportunidade EL-Matador Boxing Club, sei delega boxista na’in rua ne’ebé iha tempu badak nia laran sei partisispa event How sport fight night season five ne’ebé realiza iha nasaun Indonesia, Bali.
“Ami mós hakarak hato’o agredese ba sponsor ne’ebé durante ne’e iha inisiu apoiu El-matador Boxing Club hanesan caltech, Timor-telekom, Borela fuel L.Da, Tahana, Taihumoris inklui Maun Raul Lemos ne’ebé apoiu tebes prosesu ida iha fight ida iha Surabaya no dia 9 agora sei ajuda boxista sira hotu.” Dehan Treinadór Prinsipál El-Matadór Abilio Orlando dos Santos
Nia hatutan la haluha hato’o obrigada barak ba avo Nana ne’ebé apoiu hela orsamentu ba ekipa ida ne’e nomos Ministeriu Juventude Desportu maun Mariano Assanami Sabino no husu mós deskulpa ba sponsor sira ne’ebé la temi, nafatin apoiu malu.
“Ekipa ida ne’e ohin atu aranka iha oras rua depois ami sei to’o iha Bali sei deskansa kalan ida iha ne’eba, aban dader sei halo preparasaun medical cek-up iha tuku ida depois sabadu sei kontinua tetu, no domingu hahu joga, ne’eduni nafatin suporta ami lori Timor-Leste ba mundu.” Dehan nia
Nia salienta, hateten mós ba publiku eventu ida ne’e importante tebes liu-liu ba Timor-Leste orgullu tanba desde ukun-aan boxista hanesan Delio sai alvu ba eventu refere. Aleinde ne’e mós boxista Daniel sei kompete iha eventu ne’e, no nia sei joga iha parte segundu.
“Bazeia ba hela fatin dadaun ne’e ami kontaktu hela ho kolega sira iha ne’ebá tanba maun Raul Lemos mak prepara hela hotel ba ekipa atu hela iha ne’ebá, durante iha Bali maun Raul lemos sei suporta no ajuda ekipa ida ne’e nia nesesidade loron-loron. Husu mós ba Timor-oan tomak ba imi nia orasaun no tulun ne’ebé durante fó apoiu hela ba ekipa ida ne’e, ha’u fiar katak ekipa ida ne’e la’o hamutuk nafatin ho imi, hodi ekipa ida ne’e hatudu rezultadu di’ak ba ita hotu.” Nia haktuir
Esplika tán katak ohin simu mós mensajen husi Ministeriu Juventude Desportu husu ba boxista na’in rua bainhira tuir jogu tenke hatudu profisional nune’e hetan rezultadu ne’ebé di’ak fila mai Timor-Leste. Aleinde ne’e suporta mós husi avo Nana ho liafuan dehan katak boxista nain rua tenke fiar no hatudu mentalidade jogu, nune’e bele hetan rezultadu di’ak hodi Rai doben Timor-leste nia naran sai morin liután.
Reportajen : Nelfiano
Foto : Nelfiano