Dili, 17 Fevereiru 2025 (Média Democracia) – Fundu Nasoens Unidas ba Populasaun (UNFPA-sigla ingles) realiza Konsultasaun Nasionál hodi haree planu estratéjiku UNFPA ba tinan lima (5) Ne’ebé sei hahú husi tinan 2025 to’o tinan 2030.
Iha entrevista Reprezentante UNFPA iha Timor-Leste Navchaa Suren hateten, Fundu Nasoens Unidas ba Populasaun (UNFPA-sigla ingles), apoiu Governu tinan barak ona, liuhusi apoiu sira ne’e atu hadi’ak servisu saúde seksuál no reprodutiva.
“Apoiu ne’ebé UNFPA fó ne’e sempre aliña ho perioridade governu nian, governu nia perioridade hasoru saida aliña apoiu sira iha ne’ebá, tanba ne’e ba tinan 5 oin mai kontinua servisu sira ne’ebé durante ne’e halo ona, liu-liu mak foka liubá saúde maternal no infantil, maibé iha liu área rurais sira.” Dehan Reprezentante UNFPA iha Timor-Leste ba jornalista sira iha Salaun Nobre MNEK segunda ne’e
Nia Informa, UNFPA sei kontinua nafatin apoiu governu hodi redúz tasa mortalidade inan ho oan iha Timor-Leste.
“Durante inan isin-rua pelu menus vizita ba fasilidade saúde mínimu tenke dala haat, nune’e mós partus, tenke iha fasilidade saúde no atendementu husi pesoál saúde sira ho di’ak.” Nia informa
Perioridade xavi husi UNFPA apoiu atu redúz mortalidade Materna no Infantil iha Timor-Leste, maibé mós apoiu iha planeamentu familiar, governu agora uza termu familiar planeadu iha area rurais sira, nunee husi ezemplu ida husi feto nain haat hakarak asesu ba servisu planeamentu familiar, maibé la hetan, no ida husi feto tolu hasoru violensia bazeia ba jéneru.
Nia dehan, ne’e servisu boot ida UNFPA kontinua apoiu governu Timor-Leste atu hatan problema hirak ne’e.
“Tanba ne’e ba planu tinan 5 mai ohin mak deskute parseiru sira kona-ba servisu ne’ebé durante ne’e lao hamutuk tinan haat no lima ba kotuk, atu haree saida mak presiza hadia no saida mak presiza kontinua hodi hadia servisu saude seksual no reprodutivu iha Timor-Leste.” Dehan nia
Nia informa katak antes ne’e UNFPA servisu hamutuk ho Ministériu Saude estabelese ona fatin seguru 8 iha Timor-Leste.
“Ba oin UNFPA sei kontinua komprimisiu kapasita pesoal saude sira ne’ebé servisu iha ne’ebá atu garantia katak fatin seguru walu ne’e funsiona, nunee pesoal saude sira atende ita-nia maluk sira ne’ebé hasoru violensia bazeia ba jeneru, maibé importante los mak servisu ho Direktora sira banhira sira simu sobrevivente ruma iha fatin seguru, nunee UNFPA servisu hamutuk ho MSSI, tanba Ministériu ne’e nain ba rede referal.” Nia informa
Atinzimentu boot ida husi planu estratejiku ba tinan ikus mak governu hatudu komitmentu boot investe servisu produtu planeamentu familiar nian. Antes UNFPA mak kobre, maibé governu hola komitmentu katak, governu rasik mak sosa uza OJE iha orsamentu $1.2 milioes ne’ebé governu aloka hodi sosa produtu sira ne’e.
Reprezentante Fundu Nasoens Unidas ba Populasaun (UNFPA-sigla ingles), ne’e afirma katak atinjimentu sira ne’ebé UNFPA estabelese mak sentru kuidadu enfermajen, Munisípiu inklui iha Dili.
Reportajen : Estefania
Foto : Estefania