Dili, 06 Marsu (Média Democracia) – Forum Komunikasaun ba Feto Timor Lorosa’e (FOKUPERS), kondena makas ba asaun Asedio Seksual no Abuzu Seksual ne’ebé akontese iha publiku liu-liu iha nivel eskola sira.
Membru Forum Komunikasaun ba Feto Timor Lorosa’e (FOKUPERS) Filomena Barros dos Reis hateten, Timor-Leste hanesan instrumentus legais ida hodi asegura sidadaun sira hotu atu moris livre iha komunidade liuliu iha Eskola no Universidade sira.
“Nasaun Timor-Leste nu’udar nasaun ne’ebé iha nia instrumentu legais sira hodi asegura nia sidadaun hotu, feto, mane no labarik sira hodi moris livre no igual iha familia, sosiedade, komunidade liu-liu eskola no universidade sira. Konstituisaun RDTL iha artigu 16 no 17, konsta “Universidade no igualdade” hodi hatur katak ema hotu iha direitu iha lei na oin hodi moris livre no igual, sem iha deskriminasaun, torturasaun no violensia.” Dehan membru FOKUPERS
Membru FOKUPERS ne’e haktuir tan katak sira sei luta nafatin hodi kontra atus de violensia hasoru feto no labarik feto sira ne’ebé sai vitima ba violensia bazeia ba jeneru.
“Ami nafatin luta no halo advokasia kontra atus de violensia hasoru feto no labarik feto sira ne’ebé sai vitima husi violensia ba jeneru, no ami ho nia vizaun feto Timor-Leste moris iha dame iha uma laran, komuniadade no nasaun ne’ebé respeita igualdade jéneru no ho misaun hapara violensia hahu husi nivel individu, uma laran to’o Nivel Institusional nian liuhusi movimentu hodi hakbiit feto iha aspektu hotu-hotu ho servisu integradu.” Nia hatutan
Nia mós haktuir tan iha tinan 2025 total kazu hamutuk 40 no sobrevivente VBJ ne’ebé sei kontinua hela iha uma mahon husi tinan 2024 to’o agora hamutuk 56.
“Iha inisiu tinan 2025 total kazu ne’ebé rejistu iha Fokupers hamutuk 40 no sobrevivente VBJ ne’ebé sei kontinua hela iha uma mahon husi tinan 2024 to’o agora hamutuk 56, ne’e hatudu katak injustisa kontinua iha no buras, autor violensia kontinua livre, tanba konsidera katak violensia ne’ebé sira komete ne’e simples hodi la hatur justisa ka lei ne’ebé rigorozu hodi kondena suspeitu sira.” Nia haktuir
Violensia hasoru feto no labarik estudante sira, iha nivel eskola (terseiro siclo) to’o Universidade sira, Estudante feto sira sai nafatin alvu ba agresaun individu pesoal, superioridade no interese individu hodi haburas no hatudu ezemplu ladiak ba hahalok violensia hanesan asediu seksual no asaltu seksual. Fatin eskola no Universidade sira loloos fatin hakmatek no fatin atu kria no produz jerasaun foun nakonu ho espiritu de sabedoria laos fatin ba violensia.
Reportajen : Nelia
Foto : Ofisial Pajina Fokupers FB