Dili, 08 Marsu 2025 (Média Democracia) – Nonu Governu Konstituisionál kompremetidu sei kontinua implementa programa ne’ebé fó protesaun ba feto no labarik feto sira iha Timor-Leste hodi asegura no garante igualdade jéneru no empoderamentu.
Lia-hirak ne’e hato’o husi Primeiru Ministru Kay Rala Xanana Gusmão bainhira hola pozisaun iha komemorasaun loron feto internasuonál ne’ebé realiza iha Salaun Delta Nova Sexta ne’e.
“IX Governu Konstitusionál asume responsabilidade no iha kompromisu atu kontinua implementa programa sira ne’ebé fó protesaun ba feto no labarik feto, hodi asegura no garante igualdade no empoderamentu iha sosiedade, partikularmente sira-nia envolvimentu no partisipasaun iha desenvolvimentu ita-nia rai ida-ne’e.” Dehan PM Xanana
Nia haktuir katak iha mundu tomak dadaun ne’e desigualdade jéneru no violénsia bazeia ba jéneru sei enfrenta dezafiu.
“Reprezentatividade feto iha kargus ne’ebé foti desizaun, sei enfrenta dezafius ho nível oin-oin, iha ámbitu ida ne’e, Timor-leste hakat ona passu lubuk ida, maibé ha’u bele dehan, ita sei iha dalan ne’ebé naruk atu perkore.” Nia haktuir
Xanana Gusmão afirma katak Estadu Timor-Leste iha kompromisiu boot ba promosaun igualdade Jéneru, liu-liu reforsa atividade sira ne’ebé enkoraja no empodera feto sira-nia partisipasaun iha vida ekonómika, sosiál no polítika.
“Iha programa IX Governu, tau mós prioridade ba inkluzaun sosiál no protesaun sosiál ne’ebé hanesan ba feto no mane, kontinua implementa Planu Asaun Nasionál hasoru Violénsia bazeia ba Jéneru, Planu Asaun Nasionál kona-ba Feto, Paz no Seguransa, Declaração Maubisse.” Afirma nia
Garante igualdade oportunidades no igualdade partisipasaun husi feto no mane, nomos ba portadores defisiénsia, hanesan aspetu fundamental tebes iha prosesu desenvolvimentu Timor- Leste.
Tempu ida ne’e oportunidade tebes atu reafirma IX Governu Konstitusional ninia kompromisu atu harii sosiedade Timorense ida ne’ebé justa, digna no próspera.
Orsamentu Jeral Estadu, kada tinan inkorpora polítika orsamental ida ne’ebé ho perspektiva ba jéneru hodi kombate desigualdade ba jéneru no fó oportunidade hanesan ba feto no mane.
Kompromisu ne’e demonstra iha alokasaun Orsamentu Jerál Estadu 2025, IX Governu Konstitusionál tau prioridade iha alokasaun orsamentu ba Markador Jéneru-Prinsipál (P) ho montante US $30.43 milhões no Markador Jéneru-Signifikante (S) ho montante US $195.43 milhões.
Reportajen : Estefania
Foto : Pájina Ofisiál Primeiru Ministru Xanana