Dili, 10 Marsu 2025 (Média Democracia) – Provedor Direitus Umanus no Justisa PDHJ Virgilio da Silva Guterres “Lamukan” husu ba parte relevante atu investiga kazu violasaun seksual no abuzu seksual ne’ebé akontese iha eskola 5 de maio no Nikolau lobato, Lia-hirak ne’e hato’o PDHJ iha kna’ar fatin sexta semana ne’e
Iha entrevista ho Provedor Direitus Umanus no Justisa PDHJ Virgilio da Silva Guterres “Lamukan” hateten, situasaun ne’e sai preokupasaun boot tebes liuliu relasiona ho violasaun ho tipu abuzu seksual, tanba eskola hanesan fatin ne’ebé konsentra ema barak atu aprende siensia hodi hasae sira nia koñesimentu no sai ema ne’ebé disiplinadu, entaun kazu sira hanesan ne’e sai preokupasaun boot tebes no kazu ne’e sempre akontese mós iha fatin publiku ka instituisaun.
“Ita hatene katak kazu violasaun ho tipu violasaun seksual no abuzu seksual ne’e kazu ida ne’ebé sai hanesan preokupasaun tebes ba inan aman inklui mós ba ita hotu, tanba kazu violasaun ho tipu hanesan ne’e iha tinan kotuk PDHJ simu ona reklamasaun husi vitima sira katak iha entidade estadu balun ne’ebé halo kazu hanesan ne’e ba nia staff rasik, maibé la iha medidas legais ruma atu fó sansaun ba ema sira ne’e, ikus mai kazu refere agora sai boot liután nune’e hanaran inpunidade.” Dehan Provedor Direitus Umanus no Justisa Virgilio da Silva Guterres “Lamukan”
Nia hatutan situasaun ne’e PDHJ lamenta no preokupa tebes relasiona ho dirijente nain rua ne’e no PDHJ koalia ona ho Ministeriu Edukasaun presiza halo kampaña ba iha eskola sira atu halakon violensia escolar, inklui halakon violasaun ho tipu abuzu seksual husi Diretor ba estudante sira, husi kazu ne’e PDHJ husu mós ba Ministeriu Publiku no PSIC atu investiga kazu ne’e, hodi bele prosesa ema ne’ebé komete kazu refere, nune’e justu ba vitima sira
Reportajen : Domingas
Foto : Domingas