Dili, 10 Marsu 2025 (Média Democracia) – ALMAMOR liuhusi komisaun organizadora sei realiza eventu kompetisaun Nasionál múzika “Kore-Metan” ba banda kualifikadu husi Munisípiu sira iha fulan Maiu tinan ne’e.
Prezidente Komisaun Organizador Likurau Timor Sergio “Aseu” de Deus hateten, Objetivu husi konferénsia imprensa ne’e atu transmite informasaun husi komisaun organizadora ne’ebé prepara banda kore-metan hotu iha Munisípiu
“Durante ne’e sira rona informasaun, maibé sira hein bainhira los mak eventu ne’e komesa, através ho momentu ne’e, hakarak hatutan ba maluk sira ne’ebé involve-an hanesan banda Kore-Metan iha Munisípiu atu komesa prepara-an ona, tanba sekuénsia programa ne’e sei ba to’o iha Munisípiu no atividade hirak ne’e mós sei ba Munisípiu.” Dehan Prezidente Komisaun Organizador Sergio ba jornalista sira iha loron sábadu (08/03/025)
Nia dehan, tuir planu atividade refere sei akontese iha fulan Maiu, antes tama ba 20 de Maiu, sei realiza iha segundu semana.
Aleinde ne’e, komisaun organizadora mós halo konseitu ba kritéria sira hanesan hatais tais orijen kada Munisípiu no músika obrigatóriu ne’ebé komisaun prepara, músika eskollidu sei entrega ba grupu kada Munisípiu nian rasik hodi dezenvolve ho lian materna.
“Tan ne’e Munisípiu tenke prepara nia prosesu audisaun, ekipa komisaun mak sei tun ba iha ne’ebá organiza sira halo kompetisaun ki’i ida iha Munisípiu depois lori sira-nia rezultadu audisaun iha ne’ebá lori mai iha komisaun tur hamutuk halo observasaun, sé mak terbaik dari yang terbaik mak sei aprezenta Munisípiu mai tuir kompetisaun iha Dili.” Nia dehan
Nia informa katak orsamentu komisaun organizadora trasa hela maibé dala ruma tuir planu la to’o, entaun komisaun mós iha planu seluk hodi bele organiza eventu ne’e rasik.
“Agora dadauk ami aranka ho 60 mill dolares amerikanu, ne’e tanba kompostu husi deslokasaun ekipa sira husi Dili ba Munisípiu, depois grupu sira husi Munisípiu mai fali Dili no sira mai konsentrasaun ka hela iha fatin ida de’it, nomos prémiu mai ho pakote, la’ós dehan taxa de’it maibé ho osan fó ba grupu sira hotu.” Nia informa
Enkuantu Kona-ba montante osan ba manán-na’in sira ne’e seidauk determina, tanba kompeténsia Almamor mak sei deside, komisaun halo planu de’it, nune’e mós kritéria atu tuir kompetisaun ne’e hahu husi tinan 18 to’o tinan 45.
Prezidente ne’e hateten katak, kada tinan halo kompetisaun, maibé ita la kee kle’an tanba grupu kore-metan ne’e la’os grupu ida ka rua de’it, no komisaun hakarak hili iha Munisípiu depois mak lori mai nasionál, komisaun mós sei halo regulamentu ba grupu ida nia membru ne’e tenke permanente, tanba sira aprezenta Munisípiu nia naran.
Iha biban ne’e segundu Vise Prezidente Almamor Jovi Baptista hatutan, planu anuál Almamor nian tinan ne’e iha kompetisaun banda kore-metan.
“Ho objerivu katak atu konserva no prezerva knananuk rai inan Timor nian, tanba ne’e dalahuluk Almamor hakarak agradese-wain tebes no suporta 100% ba komisaun organizadora ba knananuk lian inan Timor nian, liku rai Timor ne’ebé ho esforsu tomak no Almamor depois fó konfiansa ba komisaun ne’e atu hala’o hela programa ne’ebé Almamor fó.” Dehan vise Prezidente
Nia mós salienta katak Almamor seidauk iha fundu, maibé planu hirak ne’ebé hato’o sei trasa ba iha planu annual Almamor nian.
“Husi Almamor atu dehan de’it katak ba planu hotu-hotu Almamor sei buka fundus, konserteza aproxima ho governu, iha ne’e atu hateten de’it, instituisaun governu nian MJDAC, tanba ne’e iha tempu besik ita foti programa ne’e ita agrupa iha planu asaun anual Almamor nian depois ita hodi ba aproxima, nune’e programa ne’e bele la’o.” Nia salienta
Segundu-vise ne’e afirma, kona-ba teknis Almamor depozita konfiansa 100% ba komisaun organizadora mak sei elabora planu no organiza eventu refere tanba Almamor mak fó fiar ba komisaun organizadora.
Reportajen : Estefania
Foto : Estefania