Dili, 12 Marsu 2025 (Média Democracia) – Sua Eselénsia Sekretária Estadu ba Igualdade Elvina Sousa Carvalho hamutuk ho Kometiva partisipa iha enkontru altu nivel Komisaun Estatutu ba Feto Sesaun da-69, ne’ebé Foku prinsipál husi sesaun ne’e atu halo revizaun no avaliasaun ba implementasaun Deklarasaun no Plataforma Asaun Pekin nian no rezultadu husi sesaun espesiál ba da-23 Asembleia Jerál nian.
Komisaun Estatutu ba Feto (CSW) nu’udar órgaun intergovernamentál globál prinsipál ne’ebé dedika de’it ba promosaun igualdade jéneru no empoderamentu feto sira-nian.
Revizaun ne’e sei inklui avaliasaun ida kona-ba dezafiu sira ne’ebé akontese daudaun ne’e afeita ba implementasaun Plataforma Asaun no atinjimentu igualdade jéneru no empoderamentu feto sira-nian no ninia kontribuisaun ba realizasaun kompletu Ajenda Dezenvolvimentu Sustentável tinan 2030 nian.
Iha abertura enkontru ne’e loke direta husi Sekretáriu Jerál Nasoins Unidas António Guterres, ne’ebé iha nia diskursu ko’alia foku ba direitu feto sira-nian iha asuntu justisa no oinsá Estadu no ema hotu komprometidu atu apoiu organizasaun feto sira iha mundu.
“Igualdade jéneru nu’udar direitu feto nian no nu’udar asuntu justisa no fundasaun pás ba nafatin. Ita tenke fó apoiu ba organizasaun feto nian, tanba sira hala’o papél importante no ita tenke proteje defensór direitu feto nian. Ita presiza kompromisu polítiku ne’ebé boot atu rezolve krize no dezigualdade oioin.” hateten Sekretáriu Jerál ONU iha nia diskursu ne’ebé Media Democracia Asisti iha pájina ofisiál SEI iha loron kuarta (12/03/2025)
Iha fatin hanesan Diretora Ezekutiva UN WOMEN Sima Bahous nia intervensaun katak, maske feto hetan dezafiu barak maibé feto mós hetan progresu signifikativu no kontinua kompromitidu atu implementa Deklarasaun no Plataforma Asaun Pekin nian.
“Maski dezafiu barak ne’ebé iha, maibé ami atinje progresu signifikativu. Tinan 30 liubá, ita selebra progresu signifikativu iha área barak, Feto barak liu iha lideransa, bainhira feto sira iha lideransa hametin demokrasia. Deklarasaun Beijing no Plataforma Asaun nu’udar dokumentu importante ida ne’ebé rezulta husi ita-nia kompromisu koletivu, Ami kontinua kompromete atu implementa tomak Deklarasaun no Plataforma Asaun Pekin nian.” Hateten Diretora Ezekutiva ONU Sima iha nia intervensaun
Iha sesaun Komisaun Estatutu ba Feto (CSW 69th Session) tinan 2025, komunidade globál sei marka mós aniversáriu ba dala tolu husi Konferénsia Mundiál da-haat kona-ba Feto no adosaun ba Deklarasaun no Plataforma Asaun Pekin (1995).
Sesaun Komisaun Estatutu ba Feto (CSW 69th Session) ne’e partisipa husi reprezentante sira husi Estadu Membru, entidade ONU, no organizasaun naun-governamentál (ONG) sira ne’ebé hetan akreditasaun husi ECOSOC husi rejiaun hotu-hotu iha mundu ne’ebé hetan konvite atu atende sesaun ne’e.
Iha abertura enkontru Altu Nivel Komisaun Estatutu Ba Feto Sesaun Da-69 (CWS-69th) ne’e reprezentante husi Nasaun Timor-Leste, iha eventu refere partisipa husi Sua Exelénsia Sekretária Estadu ba Igualdade, Elvina Sousa Carvalho hamutuk ho Sua Exelénsia Vise-Ministra Solidariedade Sosiál no Inkluzaun Céu Brites, Prezidente Komisaun F Parlamentu Nasionál, Distinta Deputada Maria Goru-Mali Barreto, akompaña mós husi Embaixadór Misaun Permanente Timor-Leste ba iha Nasoins Unidads Dionísio Babo Soares, Diretór-Jerál SEI Armando da Costa, Asesora Polítika ba Igualdade Jéneru no Asuntu ASEAN Santina Soares, Konseleiru Misaun Permanente Timor-Leste iha ONU Licínio Branco no Sekretária Gabinete SEI Rosa Maria de Araújo, iha sala Asembleia Jerál ONU Nova Iorke Estadus Unidus Amerika.
Reportajen : Estefania
Foto : Pajina Ofisial SEI