Dili, 19 Marsu 2025 (Média Democracia) – Prezidente Institutu Kombate HIV-SIDA (INCSIDA-Sigla Portugues) Daniel Marçal hateten lia-hirak ne’e ba jornalista sira bainhira Partisipa iha atividade sensibilizasaun kona-ba Kombate transmisaun virus HIV-SIDA iha Aldeia Culau, Suku Ailoc.
“Media sira nafatin vontade, dala ruma ami tenta imi partisipa, tanba husi imi mak mundu bele hatene, Timor bele hatene HIV, imi laiha ema la hatene HIV, tanba ne’e agradese tebes, imi-nia servisu ne’e makas los, mesmu ema seidauk koñese imi didi’ak iha baze.” Dehan Prezidente
Prezidente ne’e fiar katak ho tulun Na’i Maromak nian, haree imi hotu saúde di’ak nafatin, moris di’ak, família moris iha paz no moris iha dame nia laran, nune’e nafatin rekolla informasaun no divulga nafatin informasaun ba komunidade Timor laran tomak no ba nasaun seluk.
Prezidente ne’e espresa katak média halo kobertura no divulga informasaun ne’e ba ema barak no la’ós sira-nia an rasik, tan ne’e halo tuir maromak nia liafuan dehan hadomi ema seluk hanesan ita-an rasik ne’e mak parte ida husi média nia servisu.
“Imi halo ba ema barak, la’ós ba imi-nia an rasik ne’ebé maromak nia liafuan dehan halo di’ak labele halo at ba ema katak, hadomi ema seluk hanesan ita-an rasik hanesan agora imi halo dadauk ne’e, imi la fó osan mean ba ema maibé imi fahe informasaun sira ne’ebé importante tebes atu bele fasilita ema-nia moris ne’e, servisu ida ke kapás no furak tebes.” Prezidente INCISIDA espresa
Entretantu servisu ne’ebé media halo ne’e atu fahe ka divulga informasaun ba komunidade sira atu iha koñesimentu ba iha moras HIV-SIDA ne’e, maske média la fó osan mean ba ema hotu maibé liuhusi servisu média nian bele ona habelar informasaun ba komunidade sira atu prevene-an husi transmisaun Virus HIV-SIDA.
Reportajen : Estefania
Foto : Estefania