Dili, 21 Marsu 2025 (Média Democracia) – Ministeriu Solidariedade no Inklusaun Sosial (MSSI) simu ekipamentus husi Federasaun Feto China liuhusi Embaixada China iha Timor-Leste
Ministra Solidariedade Sosial no Inklusaun Sosial (MSSI) Veronica das Dores hateten, apoiu ne’ebé embaixada china fó ne’e mai husi rezultadu ne’ebé Vise-Ministra MSSI partisipa enkontru iha China
“Apoiu ne’e rezultadu hetan husi partisipasaun Vise-Ministra MSSI ninia enkontru ida iha China, fulan Setembru 2023 hodi halo diskusaun ekipa grupu feto sira iha China hodi ko’alia kona-ba familia vulneraveis iha Timor Leste” Dehan Ministra MSSI
Ministra mós hateten tan katak Grupu feto liuhusi embaixada China iha Timor-Leste matein komunikasaun kona-ba matrial saida mak presiza liuliu atu tulun inan feton no labarik sira iha area remotas.
“Grupu feto iha China liuhusi Embaixada China iha Timor-Leste, kontinua la’o to’o 2024 hodi mantein komunikasaun kona-ba materia saida mak ita presiza ita kordena no haree ba nesesidade prinsipal ne’ebé bele tulun inan feton sira no labarik liuliu iha area remotas.” Dehan Ministra MSSI ba Jornalista sira iha edifisiu MSSI
Ministra mós afirma tan katak, MSSI sei halo planu liuhusi Diresaun Jeral Protesaun Sosial atu apoiu ba feto vitima sira liuhusi violensia juventude no labarik sira ne’ebé merese duni atu hetan.
“Ba doasaun hirak ne’e MSSI sei halo planu liuhusi Diresaun Jeral Protesaun Sosial bele utiliza apoiu ba feto vitima liuhusi violensia juventudes no labarik sira ne’ebé merese duni atu hetan. Mateial hirak ne’e ami la fo ba pessoal ida idak maibe ami fo ba instituisaun solidariedade social ne’ebé mak ami nia parseiru” dehan Ministra MSSI
Iha sorin seluk Embaixadora China iha Timor Leste H.E Wang Wenli hateten, MSSI sempre iha komprimisu atu hadi’a kondisaun grupu vulneravel sira no promove ekidade no kresimentu inkluzivu.
“Ministeriu Solidariedade no Inklusaun Sosial Timor-Leste nian sempre iha kompromisu atu hadi’a kondisaun moris grupu vulneravel sira-nia no promove ekidade sosial no kresimentu inkluzivu. Nune’e mós federasaun feto China tomak nu’udar organizasaun feto boot liu iha China dedika-aan kleur ona atu proteje direitu no interese feto no labarik sira nia, promove dezenvolvimentu feto nian no ativamente envolve iha internasional.” Dehan nia
Embaixadora China iha Timor-Leste mós hatutan, Doasaun ne’e marka kolaborasaun dahuluk entre federasaun Feto China hotu.
“Doasaun ne’e marka kolaborasaun dahuluk entre federasaun feto China tomak, embaixada China iha Timor-Leste, no Ministeriu solidariedade Sosial no inklusaun. Ida ne’e iha signifikadu boot tebes liuhusi inisiativa ida ne’e, China hein katak fornesimentu sira ne’e bele ajuda labarik Timor-oan sira asesu ba kondisaun aprendizajem ne’ebe di’ak liu, fó oportunidade empregu barak liután ba feto sira, no kontribui ba dezenvolvimentu sosial nasaun nian.” Informa Embaixadora China
Material sira ne’ebé federasaun feto China oferese liuhusi Embaixada China ba Ministeriu Solidariedade no Inklusaun Sosial hanesan atus-hitu limanulu (750) livru istoria ba labarik, atus-rua limanulu (250) brinkedus alfabetu, tolunulu resin-lima (35) makina suku ropa no ruanulu (20) laptops.
Reportajen: Nélia
Foto : Nélia