Dili, 24 Marsu 2025 (Média Democracia) – Autoridade Protesaun Civil (APC) liuhusi ekipa Gabinete Relasaun Externa no Komunikasaun (GREK), relata dadus semanal kona-ba akontesimentu dezastre naturais iha Timor-Leste, durante semana ida nia laran, konferénsia ne’e hala’o iha salaun APC Caicoli Dili.
Tuir Xefe Gabinete Relasaun Externa no Komunikasaun (GREK) Nelson Nunes Orleans, informa katak Autoridade Protesaun Civil rejistu kazu dezastre hamutuk atus-ida limanulu resin-sia (159) iha semana ne’e nia laran, tanba kauza mai husi mudansa klimatika ho tipu ne’ebé diferente.
“Durante semana ida ne’e nia laran iha Timor-Leste akontese tipu dezastre naturais nune’e Autoridade Protesaun Civil rejistu kazu uma ne’ebé hetan estragu. Anin boot sobu uma hamutuk 21 no priense kriteria 40 ahi han uma hamutuk 7 rai halai ho uma hamutuk 36 apoiu emerjensia hamutuk 55. Dehan Xefe Gabinete Relasaun Externa no Komunikasaun (GREK) Nelson Nunes Orleans
Nia hatutan numeru ema afetadu hamutuk atus-haat tolunulu resin-hitu (437) ema evakua hamutuk atus-ida neennulu (160), kauzu hirak ne’ebé autoridade rejistu tanba kauza husi mudansa klimatika ne’ebé akontese iha rai laran
“Dezastre ne’ebé akontese iha Munisípiu sira hanesan munisípiu Ainaro bee sai uma 3 no rai halai uma 1, Munisípiu Bobonaro rai halai uma 1, Munisípiu Covalima rai halai uma hamutuk 2, Munisípiu Dili bee sai uma 1, Munisípiu Ermera anin boot sobu uma 10 no bee sae uma 1, Munisípiu Lautem ahi han uma 1, Munisípiu Manufahi anin boot sobu uma 1 no ahi han uma 2, Munisípiu Viqueque anin boot sobu uma 1 inklui Rejiaun Espesial Oe-cusse Ambeno RAEOA anin boot sobu uma 9, bee sai uma 26, rai halai uma 1 no ahi han uma 4.” Dehan nia
Nia salienta daudaun ne’e komandu Autoridade Protesaun Civil ne’ebé destakadu iha Munisípiu hamutuk ho nia parseiru relevante fornese asistensia emerjénsia ba familia afetadu sira ba dezastre naturais hanesan ai-han no laos ai-han (Food item & non-food item).
Esplika liután Komandu Operasional Autoridade Protesaun Sivil Munisípiu kontinua hodi halo levantamentu detaillu kona-ba sasan ne’ebé estragu no lakon, nune’e hodi halo verifikasaun tuir tipu dezastre ida-idak nian, tanba dezastre ne’ebé akontese iha semana ida nia laran hamutuk 159.
Reportajen : Nelfiano
Foto : Nelfiano