Dili, 27 Marsu 2025 (Média Democracia) – Ministeriu Interior liuhusi Sekretariu Estadu Protesaun Sivil Autidade Porotesaun Sivil servisu hamutuk Cruz Vermella Timot-Leste (CVTL) hala’o enkontru kona-ba Rede Jestaun Risku Dezastre ne’ebé akontese iha rai laran, atividade ne’e hala’o iha CVTL Bairo Formoza kuarta semana ne’e.
Sekretariu Jeral CVTL Luis Pedro Pinto hateten, atividade Rede jestaun risku dezastre ne’e lidera husi APC kada fulan tolu-tolu konvida liña Ministerial hamutuk parseiru internasional no lokal sira hodi troka ideias ba malu kona-ba atividade ne’ebé atu realiza iha futuru bele dezenvolvimentu ho di’ak liután.
“Asuntu jestaun risku dezastre ne’e laos asuntu Ministeriu no organizasaun ida nian maibé parseru hotu nia hamutuk foin bele rejolve kona-ba asuntu jestaun risku dezastre nian ne’ebé sempre akontese iha rai laran.” Dehan Sekretariu Jeral CVTL Luis Pedro Pinto
Nia hatutan liuhusi enkontru ne’e hala’o atu partilla ba malu kona-ba informasaun saida mak organizasaun sira-nia hanoin no ideias nune’e realiza programa intervensaun ba dezastre ne’e di’ak liután iha futuru.
“Enkontru ida ne’e ita sei kolia kona-ba termus referensia kona-ba rede jestaun risku dezastre nian atu fó hanoin ideias atu ita bele hetan aprovasaun husi prezidente ba futuru oinsá parseru hotu iha komitmentu atu halo programa jestaun dezastre nian ne’e bele iha rede nia laran, nune’e bele dezenvolve programa ne’e ho di’ak iha futuru.” Dehan nia
Nia salienta dezafiu ne’ebé hasoru kona-ba parte governu nian ho parseru hotu-hotu iha koñesimentu ne’ebé di’ak ho rekursu ne’ebé naton atu responde. Maibé dezafiu ne’ebé komunidade sira sempre hasoru tanba nesesidade nia obriga balun tenke ba hela iha fatin risku hodi hamosu dezastre.
“Ha’u fiar iha komunidade balun ne’ebé kontribui dia’k tebes hodi suporta husi lideransa governu no parseru hotu ninian atraves husi APC fó nia diresaun ne’ebé di’ak tebes halo komunidade sira balun konvensidu atu labele hela iha fatin risku.” Nia haktuir
Nia afirma programa ne’e kontinua realiza, nune’e bele kuda komunidade nia koiñesimentu haree ba situasaun extrimu ida agora ho koñesimentu ne’ebé naton bele hamosu vulnerabilidade maka’as liután iha nia komunidade nia le’et hodi satan dezafiu ne’ebé sira infrenta.
“Investimentu ba asuntu jestaun risku dezastre parte preparasaun nian ne’e menus liu duke ida responde nian. Iha futuru atu servisu di’ak liután tenke investimentu barak liubá komunidade sira. Ita prepara komunidade sira ho di’ak iha koñesimentu halo atividade antisipasaun ba iha asuntu dezastre, nune’e ita bele hakat liu dezafiu hirak ne’e.” Nia relata
Nia informa hanoin katak preparasaun ho koñesimentu ne’e naton no di’ak teb-tebes durante ne’e, oinsá ba futuru bele mellora di’ak liután atu halo intervensaun sira.
“Dadaun ne’e programa kontinua lao tantu husi APC mós hala’o atividade sira ne’e ho ajensia internasional no lokal sira depois ba iha UN kontinua halo servisu hamutuk hodi sensibilizasaun informasaun ba komunidade sira ne’ebé hela iha fatin risku.” Nia afirma
Nia relata koalia kona-ba situasaun iha parte rua hanesan, akontese bailoro naruk no tempu udan, entaun situasaun ne’e bele fó dalan mai ita atu hasa’e komunidade nia koñesimentu liu-liu sira ne’ebé hela iha fatin risku. Dadaun ne’e parseru hotu-hotu servisu hamutuk ho govenu hasoru direta hodi fó koñesimentu ba komunidade sira uza plataforma liuhusi média no meius oioin atu hasa’e sira nia koñesimentu, nune’e bele hadook-aan husi risku dezastre.
Iha sorin seluk Prezidente APC Jesuino dos R.M. Carvalho hateten, objetivu husi enkontru ida ne’e atu fahe hanoin ba malu oinsá atu haforsa liután jestaun ba risku dezastre ne’ebé sempre akontese, tanba governu preve orsamentu inklui parseru dezenvolvimentu sira mós fó apoiu.
“Ita mós tenke prepara-aan ho didia’k tanba ne’e ho liña Ministerial ami bolu malu hamutuk ho parseru ne’ebé fasilita atividade husi CVTL sorumutu ne’e ho ONG internasional no lokal sira mai hamutuk oinsá atu fahe hanoin ba malu hodi halo redusaun ba asuntu risku dezastre ne’ebé sempre akontese iha rai laran.” Dehan Prezidente APC Jesuino dos R.M. Carvalho
Nia hatutan durante ne’e governu no parseru dezenvolvimentu sira servisu hamutuk duni hodi fó hanoin malu, nune’e bele tulun komunidade sira ne’ebé durante ne’e sempre infrenta ba risku dezastre nian.
Esplika liután katak relasiona ho sorumutu ne’e Governu liuhusi Autoridade Portesaun Sivil hamutuk ho parseru dezenvolmentu sira atu diskute kona-ba asuntu jestaun risku dezastre nian hodi fó ideias ba malu, nune’e bele fahe formasaun direta ba komunidade sira ka liuhusi plataforma média, nune’e komunidade sira iha koñesimentu hodi hadook-aan husi risku dezastre ne’ebé sempre akontese iha rai laran
Reportajen : Nelfiano
Foto : Nelfiano