Dili, 27 Marsu 2025 (Média Democracia) – Ministeriu Agrikultura Peskas Pekuaria no Floresta asina projetu konstrusaun eskema irrigasaun watuwa/modobuti ho kompania China Nuclear industry CO.LTD, projetu konstrusaun ne’e sei hala’o iha Munisipiu Baucau Postu-Administrativu Baucau Villa kobre suku neen, serimonia asina projetu ne’e halo iha salaun MAPPF Dili.
Iha entrevista ho Ministeru Agrikultura Peskas Pekuaria no Florestas (MAPPF) Marcos da Cruz hateten, objetivu ohin nia ba atividade ida ne’e asinatura ba projetu irrigasaun ida bolu naran watuwa/Modobuti no projetu irrigasaun refere sei hala’o iha Munisipiu Baucau Postu Baucau Villa.
“Projetu irrigasaun ne’e sei kobre ba iha suku hirak hanesan Samalari, Gariwai, Wailili, Buibau, Seisal, Buruma, nia area total ne’e rihun-ida atus-rua sianulu hektares, tanba iha area sira ne’e abandonadu no ita sei halo konstrusaun hotu sei kobre ba iha area hirak ne’ebé ohin ha’u temi ona. Munisipiu Baucau mós iha kanal irrigasaun tolu durante ne’e uza eskavador makina pezadas deit mak normaliza be’e ba komunidade.” Dehan Ministeru Agrikultura Peskas Pekuaria no Florestas (MAPPF) Marcos da Cruz
Nia dehan orsamentu total ba iha projetu irrigasaun ne’e hamutuk 22,605,639.25 durasaun ba iha konstrusaun projetu irrigasaun ne’e durante tinan tolu nian naran ba iha projetu refere, no projetu ne’e rasik sei kaer husi kompaña China Nuclear industry 22END CO.LTD espera katak komunidade Munisipiu Baucau bele koopera ho kompaña nomos Autoridade sira atu nunee bele implementa projetu irrigasaun.
Hatutan husi Diretor jeral da Filial Timor-Leste Xina Nuclear Industry CO., LTD Dai LinFeng hateten, ohin loron asina projetu ida ne’e atu halo projetu konstrusaun eskema irrigasaun watuwa/modobuti atu bele halo irrigasaun iha Munisipiu Baucau.
“Projetu ida ne’e signifika planu kooperasaun husi nasaun Xina nomos nasaun Timor-Leste atu haree ba iha projetu konstrusaun ba irrigasaun, tanba ita hatene katak Timor-Leste maioria nakonu ho setor agrikultura, tanba ne’e irrigasaun importante tebes atu bele tulun agrikultura sira iha Munisipiu Baucau Postu-Administrativu Baucau Villa atu bele hasae produsaun ida ne’ebé ho kualidade iha future.” Dehan Diretor jeral da Filial Timor-Leste Xina Nuclear Industry CO., LTD Dai LinFeng
Nia hatutan sente orgullu tebes tanba bele hetan fiar husi MAPPF nomos ninian diresaun servisu hotu hodi halo konstrusaun ba iha irrigasaun ne’e, nomos reprezenta ona nasaun Xina liuliu iha kompaña ida ne’e atu sai parseiru ba dezenvolvimentu nasaun Timor-Leste.
Reportajen : Domingas
Foto : Domingas