Dili, 27 Marsu 2025 (Média Democracia) – Maria Esmeralda da Silva ho idade (50) husi Munisípiu Dili Postu-Administratvu Dom Alexo Suku Comoro Aldeia Moris foun vitima eviksaun ne’ebé dadaun hela iha karentina Tasi-tolu sente triste tanba sasan la folin hanesan ho tempu uluk sei iha Aldeia moris foun.
Tuir negosiante Maria Esmeralda da Silva hateten, sente triste tebes bainhira sei hela iha Fomentu mota-ninin kria atividade negósiu hanesan halo keos ki’ik ema sei hola no hetan netik osan, maibé estadu muda tiha mai hela iha karentina Tasi-Tolu sasan la folin.
“Ha’u sente triste tebes tanba sasan ne’ebé loron-loron ha’u fa’an la folin hanesan sei hela mota ninin. Maibé estadu seidauk muda ami sei hela iha fomentu mota ninin sasan sempre folin, no loron ida hetan osan $10 to’o 20 dolar hodi sustenta ba ami nia presiza loron-loron nian. Bainhira estadu muda ami mai hela iha Karentina durante fulan ida liu ona sasan ne’ebé ha’u fa’an loron ida hetan de’it $1.00 to’o 2.00 dolar.” Dehan negosiante Maria Esmeralda da Silva
Nia hatutan durante estadu muda mai hela iha karentina susar tebes atu halo negósiu tanba ema barak mak halo negósiu hanesan keos ki’ik, ne’eduni atu garantia ba se mak atu hola sasan.
“Ami nia sasan fa’an la folin tanba ema ne’ebé mai husi mota ninin barak mak halo keos ki’ik, dadaun ne’e mai hela hotu iha ne’e ida-idak loke nia keos, entaun see mak atu hola ami nia sasan, ne’e impaktu boot tebes mai ami ne’ebé moris bazeia de’it ba keos, tanba ami laiha servisu seluk atu sustenta ami moris loron-loron.” Dehan nia
Nia salienta, durante sei hela iha mota ninin sira mós painera rai-henek hodi fa’an atu hetan netik osan hodi sustenta ba nesesidade nian no haree mós oan sira-nia eskola maibé estadu muda mai hela iha karentina dook husi mota, nune’e susar tebes atu hetan osan husi pineira raihenek iha mota.
Esplika liután keos ne’e loke komesa iha tinan 2014 nia laran mai to’o agora, tanba iha momentu ne’ebá nia kaben loron-loron painera raihenek ema sempre ba hola, entaun bele hetan osan ituan hodi sustenta ba ami-nia presiza no osan balun tau hamutuk hola sasan hodi halo negósiu ki’ik iha uma.
Reportajen : Nelfiano
Foto : Nelfiano