Dili, 28 Marsu 2025 (Média Democracia) – Kámara Komérsiu Indústria Timor-Leste (CCI-TL), no Servisu Rejistu Verifikasaun Emprezariál, Institutu Púnliku (SERVE.IP) estabelse nota entendimentu hodi hametin servisu atu fó asisténsia ba levantamentu dadus empreza hirak ne’ebé rejistu iha Serve.Ip.
Prezidente CCI-TL Jorge Serrano hateten, atividade asina nota entendimentu ne’e atu instituisaun rua ne’e bele servisu besik liután, tanba Kamara Komérsiu Industria hanesan parseiru estratejiku governu nian, ne’eduni labele la’o mesak, tan ne’e lori CCI-TL nia naran apresia ba Diretór Serve.Ip.
“Ha’u lori CCI-TL nia naran fó apresia ba Diretór SERVE ninia jestu no maneira ne’ebé buka ita no kontaktu malu atu bele servisu hamutuk hodi fó asisténsia ba levantamentu dadus, ha’u hanoin katak Serve halo servisu tinan barak nia laran ba rejistu empreza sira, mesmu ho difikuldade barak maibé sira konsege rejista empreza barak iha atividade ekonómika iha Timor bele la’o ho di’ak.” Dehan Prezidente CCI-TL iha Sala konferénsia CCI-TL, Kinta ne’e (27/03/2025)
Prezidente ne’e fiar katak, levantamentu dadus ne’ebé Kamara Komérsiu halo, hetan apoiu husi fundu subvensaun públika husi Vise-Primeiru Ministru nomos hanesan Ministru ba Asuntu Ekonómiku Ambiente Turismu nia apoiu, ho nune’e iha asina akordu ne’e CCI-TL la hala’o servisu Serve nian maibé atu fó lisensa ba ativudade ekonomia de’it.
“Objetivu levantamentu dadus ne’ebé ami halo ne’e la’ós atu halo servisu Serve nian, maibé Serve ho Autoridafe tomak atu fó lisensa ba kompaña sira iha Timor halo atividade ekonómika, negósiu no bisnis hanesan mós krediveis fó sertifikadu de investidór, Kamara Komérsiu Insdústria hanesan mahon ba emprezariu/a hotu atu ba verifika, tanba ami-nia papél nomos fó advokasia atu rejista empreza sira mai ami tenke tun ba verifika.” Nia informa
Tanba liuhusi Prova lisensa ne’e sei haree empreza ne’e halo duni atividade tuir nia rejistu ne’e ka lae, no nia kontribui ba empregu ka lae, nomos karik loke empreza boot ne’e iha atividade boot duni ka lae, tanba dala ruma lisensa empreza boot no fin ba haree nia loke keos ka empreza mediu.
Nia dehan objetivu husi servisu hamutuk ne’e mak atu hadi’ak servisu sira entre instituisaun rua nian atu di’ak liután.
“Ha’u hanoin instituisaun Estadu nian liuliu ajensia sira governu nian hamutuk ho Kamara Komersiu nian ita bele fó liman ba malu, ha’u fiar ita sei asegura buat barak di’ak, loke oportunidade no ita organiza sasan ho di’ak, entaun ita buka servisu hamutuk atu nune’e ita la’os dehan katak ita merkadu livre maibé ita mós presiza oraganiza tiha merkadu ida ne’e atu nune’e labele iha perseisaun barak iha publiku katak ita fasilita de’it.” Nia dehan.
Iha fatin hanesan Diretór Ezekutivu SERVE.IP. Fausto Soares Dias lori instituisaun Serve nia naran agradese ba prezidente CCI-TL ho nia kometiva tomak, aleinde ne’e Diretór ne’e informa katak iha nia mandatu nia haree dadus husi Empreza Unipessoal ho Limitada ne’e kuaze Mill itál maibé kampu traballu hira mak loke iha rai laran.
“Ha’u la hatene Limitada no Unipesoal ne’e fó benefisiariu hira, ita halerik bebeik dehan servisu laiha maibé kompaña sira mai loke hela ne’e, ha’u la hatene loos ba halo saida, tanba ne’e ha’u agradese ba servisu sira ne’ebé mai husi CCI-TL hamutuk ho Serve Ip, no ita hotu lao tuir lei ne’ebé atribui ba servisu ne’e, hakarak lakohi Serve IP mós servisu hamutuk hodi hatene sasan sira ne’e.” Dehan Diretór Ezekutivu Serve.Ip
Nia salienta katak, dalabarak Serve ba halo servisu iha terrenu Administradór Munisipiu no Postu sira husu kona-ba lisensa ba empreza estranjeiru ne’ebé ba to’o iha Munisipiu.
“Sira ataka los dehan diretor dehan fó hela deit lisensa ba maibé nusa fó ba Xina sira mak to’o iha ami nia Munisipiu, nune’e ha’u hatan ba sira katak ita-nia lei inan loke dalan ba merkadu livre, fila-fali ba ita oinsa tenke jere merkadu livre la’o tuir nia dalan, sé ita la kontrola didi’ak saida mak iha ita bele iha ita nia rain mós ita sai penonton, tanba ita husik buat ne’e livre.” Nia salienta
Diretór ne’e dehan, sei hakarak servisu buka mekanismu atu haree didi’ak katak bele loke kompaña maibé nia benefísiu ne’e iha ka lae, tan ne’e intensaun husi Serve. IP servisu hamutuk ho CCI-TL nia fiar katak ho sukursal sira iha fatin hotu ne’e bele suporta ho atividade sira iha teritoriu tomak hodi bele aselera, karik dadus sira ne’e iha ona ita bele kompleta.
Reportajen : Estefania
Foto : Estefania