Dili, 08 Abril 2025 (Média Democracia) – Prezidente Repúblika (PR) José Ramos-Horta, konvoka reuniaun ho membru Konsellu Superior Defeza no Seguransa (KSDS), atu haree kona-ba oinsá atu hametin servisu ho kapasidade hodi garante pas, garante seguransa no estabilidade iha rai laran.
Porta-vós Konsellu Superior Defeza no Seguransa (KSDS), João Aparicio Guterres hateten, ohin Prezidente Repúblika (PR) Jose Ramos-Horta konvoka enkontru ho membru husi Konsellu Superior Defeza no Seguransa (KSDS), atu haree hamutuk kna’ar servisu esensiál husi instituisoens Estadu nian, hanesan Falentil-Forsa Defeza Timor-Leste (F-FDTL), Polisia Nasional Timor-Leste (PNTL) no Polisia Siéntifika Investigasaun Kriminál (PCIC) kona-ba kontrolu armamentu imunisoens.
“Parte ida atu hametin di’ak liután kapasidade hodi garante pas, seguransa no estabilidade iha rai laran parte seluk atu garante seguransa ba ita nia populasaun, mantein orden publika iha Timor-Leste no partisipasaun ativa husi sidadaun sira hotu, ba seguransa nasionál.” Dehan Porta-vós Konsellu Superior Defeza no Seguransa (KSDS) João Aparicio Guterres ba jornalista sira iha Palásiu Prezidensiál Bairu-Pite, Dili, Segunda 7/08.
Nia hatutan ne’e duni, aspetu ne’ebé importante liu ohin koalia sai iha reuniaun ne’e maka, koalia kona-ba kontrolu ida rigoroju tebes kona-ba uza armas no kordenasaun mais alto nivel depois iha parte seluk realsa mós treinamentu ho kapasitasaun instituisoens tolu ne’e ninia, iha pontus barak ne’ebé iha, maibé sobre sai liu pontu rua mak tenke iha disiplina no etika kuandu uza kilat.
“Ha’u atu koalia kona-ba rezultadu reuniaun ninia, maibé aspetu sira ne’ebé importante maka garante seguransa rai laran ninia, garante integridade operasoens militar ninia, garante komprimentu normas legais rai laran ninia, no internasionais kona-ba seguransa, no direitus umanus.” Nia informa
Konsellu Estadu hanesan orgaun konsultivu Prezidente Repúblika nian ba asuntu polítiku, bazeia ba Konstituisaun RDTL artigu 90 no 91 no Konsellu Superiór Defeza no Seguransa hanesan orgaun konsultivu Prezidente Repúblika nian ba asuntu defeza, seguransa no soberania, bazeia ba Konstituisaun RDTL artigu 48.
Membru ba Konsellu Superiór Defeza no Seguransa hamutuk 13 hanesan Primeiru-Ministru, Kay Rala Xanana Gusmão, Ministru Negósiu Estranjeiru no Kooperasaun, Bendito dos Santos Freitas, Ministru Defeza, Contra Almirante Donaciano Costa Gomes ‘Pedro Klamar Fuik’, Ministru Interiór, Francisco da Costa Guterres Ministru Justisa, Amândio Sergio Hornai. Reprezentante Parlamentu Nasionál Deputada Maria Terezinha da Silva Viegas, Deputadu David Mandati Dias Ximenes no Deputadu Duarte Nunes. Xefe Estado Maior Generál das F-FDTL, Tenente-Jeneral Domingos Raul ‘Falur Rate Laek’, Komandante Jerál PNTL, Komisáriu Jerál Henrique da Costa, Diretór Jerál Servisu Nasionál Intelijénsia, Longuinhos Monteiro, Júlio Tomás Pinto no Nuno Manuel Corvelo de Andrade Sarmento ne’e Nomeadu husi Prezidente Repúblika.
Reportajen : Domingas
Foto : Media Offiser PR