Dili, 15 Abril 2025 (Média Democracia) – Prezidente Republika Jose Ramos-Horta, kondekora Medalla Méritu no Sertifikadu Elojiu ba atleta no treinador Timor-oan sira ne’ebé partisipa iha Jogu Sudeste Aziátiku (SEA Games). Kondekorasaun ne’e fó sai liuhusi dekretu lei ne’ebé asina husi Prezidente Ramos-Horta iha loron 8 fulan abril tinan 2025.
Hodi Prezidente Ramos-Horta nia naran Xefe Gabinete Prezidénsia Repúblika Timor-Leste nian, Sra. Jesuína Maria Ferreira Gomes, aprezenta kondekorasaun ne’e iha serimónia ofisiál ne’ebé hala’o iha Palásiu Prezidensial Nicolau Lobato. Resipiente sira inklui reprezentante na’in 5 husi Konfederasaun Desportu Nasionál Timor-Leste (CDTL), atleta 32 ne’ebé kompete iha Bokse, Shorinji Kempo, Karate-do, Taekwondo, no Treinador 15 ne’ebé orienta atleta sira ne’e ba susesu.
“Medalha Méritu ne’e rekoñese realizasaun Exelente husi atleta Timor-oan sira ne’ebé reprezenta Timor-Leste iha kompetisaun desportu internasionál no lori rezultadu esepsionál ba nasaun.” Dehan Xefe Gabinete Prezidénsia Repúblika Timor-Leste
Reprezentante sira tuirmai husi Konfederasaun Desportu Timor-Leste (CDTL) mak simu Medalla Méritu:
- Macário Floriano Sanches, Reprezentante husi Konfederasaun Desportu Timor-Leste
- Miguel Marques Gonçalves Manetelu, Reprezentante husi Modalidade Shorinji Kempo
- João José Fernandes, Reprezentante husi Modalidade Bokse
- Filomeno Soares de Araújo, Reprezentante husi Modalidade Karate-do
- Gabriel J. M. F. de Jesus da Costa, Reprezentante husi Modalidade Taekwondo
Atleta na’in-neen ho Medalla Osan-Mean husi modalidade Shorinji Kempo ne’ebé simu Medalla Méritu nian mak:
- António Manuel
- Brígida Nívia M.L. Savio
- Julianto Pereira
- Silviana de Jesus Carvalho
- Dorceyana Borges
- Lola Caldas da Silva da Costa
Aleinde ne’e, atleta na’in ruanulu-resin-neen no treinador sanulu-resin-lima simu Sertifikadu Elojia ba sira-nia kontribuisaun no realizasaun exelente.
Iha diskursu Prezidente nian, ne’ebé hato’o husi Xefe Gabinete, Prezidente Ramos-Horta hateten hanesan “Ita-nia atleta sira nu’udar embaixadór Timor-Leste nian iha palku globál. Medalla Méritu sira ne’e la’ós de’it onra exelénsia atlétika, maibé ita-boot sira-nia personifikasaun ba ita-nia espíritu nasionál. Liu husi imi-nia dedikasaun no dignidade iha kompetisaun, imi hatudu ba mundu se mak ita nu’udar povu ida. Desportu hametin ita hamutuk liu husi diferensa no inspira ita-nia juventude atu mehi ho aten-brani bainhira ita harii Timor-Leste ida ne’ebé realizasaun atlétika hametin unidade nasionál no pás.
Serimónia ne’e reprezenta nasaun nia agradese ba atleta sira ne’e, liuhusi sira-nia dedikasaun, disiplina, no realizasaun sira hasae ass ona bandeira Timor-Leste no hatudu espíritu indomável povu Timor-Leste nian, sira-nia susesu reflete nasaun nia forsa no determinasaun ne’ebé buras ba beibeik iha palku mundiál, sai nu’udar inspirasaun ba sidadaun Timor-oan hotu bainhira nasaun ne’e kontinua harii nia demokrasia joven.
Reportajen : Domingas
Foto : Domingas