Dili, 22 Abril 2025 (Média Democracia) – Sarani katolika Timor sente triste no lakon bainhira rona novidade Sua Santidade Papa Francisco hakotu nia viajen iha mundu.
Iha entrevista ho sarani husi parokia Catedral, Elena Ximenes hateten, hanesan sarani katolika sente triste no lakon bibi atan diak ida ne’ebé hadomi sarani katolika hotu inklui sarani katolika Timor, hanesan sarani sente lakon tebes ema di’ak ida tanba Sua Santidade Papa Francisco foin halo vizita iha Timor, nia rasik hateten katak sarani katolika Timor labele odio malu maibé nafatin hadomi malu.
“Ami hanoin tebes no sente hanesan lakon leet husi ita sorin maske dook maibé rona novidades ida ne’e fuan taridu, memoria ne’ebé ha’u sei lebra bainhira iha vizita Sua Santidade Papa Francisco mai iha Timor hateten katak sarani labele husik lafaek tata ita-boot sira, esplikasaun hirak ne’e mak hanesan sarani ha’u sei lembra tanba Sua Santidade hatene ona katak Timor ne’e maioria katolika, tan ne’e antes nia fila ba Vaticano nia husik hela mensajen refere.” Dehan sarani Elena Ximenes
Nia salienta ohin sarani hotu mai konsentra iha jardim da nossa senhora ne’e atu hasa’e orasaun ba iha Sua Santudade Papa Francisco, maske la to ba iha Vaticano maibé hanesan sarani fiar katak orasaun sei to’o ba Sua Santidade Papa Francisco tanba ho fiar ida katak Papa Francisco iha sarani sira nia fuan, tan ne’e mak ohin sarani hotu halibur malu iha ne’e atu hasae orasaun ba iha Sua Santidade.
Hatutan husi sarani parokia Motael Castro Tavares hateten, horiseik hanesan sarani katolika husi Timor haree informasaun liuhusi média sosial katak Sua Santidade Papa Francisco hakotu ona nia peregrinasaun iha mundu, hanesan sarani senti triste no lakon tebes bibi atan diak ida ne’ebé husik ona mundu ida ne’e.
“Hanesan sarani katolika Timor-oan sente lakon tanba tinan kotuk Sua Santidade sei halao vizita iha ne’e hodi husik hela mensajen lubuk boot ida ba iha sarani sira no ba lider sira, Bainhira hanoin fali memoria Sua Santidade Papa Francisco nian sente triste tebes, maibé agradese ba Maromak tanba Maromak hadomi liu Sua Santidade Papa Francisco hodi bolu ona nia ba hamutuk iha Maromak nia kadunan santu, Sua Santidade Papa nia memoria ida ne’ebé hanesan sarani katolika ha’u sei lembra mak nia hateten katak, durante ha’u vizita nasaun hirak ne’e ha’u nia fuan monu ba nasaun Timor-Leste, liafuan hirak ne’e bainhira ami hanoin hamonu matanben.” Dehan sarani parokia Motael Castro Tavares
Nia hatutan mensajen lubuk ida ne’ebé Sua Santidade Papa fó hela mak, husu sarani Timor atu mantein kultura, nune’e labele husik kultura seluk domina iha nasaun ida ne’e, mensajen seluk ne’ebé Sua Santidade Papa husik hela mak, husu ba inan aman sira atu tau matan ba iha kikoan oan sira nomos husu ba joven sira atu hadomi malu no labele odio malu ka halo problema. Husi mensajen hirak ne’e mak sai hanesan memoria durante vizita Sua Santidade Papa iha Timor nian.
Atu esplika kle’an liután katak sarani katolika Timor-oan sira halibur malu hamutuk iha jardim nossa senhora largo lecidere husi parokia Katedral, Motael, Balide, Bidau hodi hasae orasaun sunu lilin no lori mós aifunan hodi ba rai iha nossa senhora.
Reportajen : Domingas
Foto : Domingas