Dili, 25 Abril 2025 (Média Democracia) – Sekretária Estadu ba Igualdade, akompaña husi Diretora-Jerál Interina-SEI hamutuk ho Komisária Komisaun Funsaun Públika (CFP) realiza workshop kona-ba Responsável Portufóliu no Dezenvolvimentu Karreira Espesiais, halo mós abertura tema “Jestaun no Governasaun Di’ak”, Subtema “Sistema Kontrolu Internu” ba estrutura S.E.I, atividade ne’e hala’o iha kinta semana ne’e.
Sekretária Estadu ba Igualdade Elvina Sousa Carvalho hateten, objetivu husi kolókiu ne’e atu partilla informasaun hodi fó hanoin ba Funsiunáriu tomak Ajente Administrasaun Públika no Funsiunáriu Kazuál sira ne’ebé seidauk hetan koñesimentu kona-ba konteudu no lala’ok tema refere.
“Realiza workshop ne’e atu fó oportunidade hanesan ba Pesoál nian, la husik ema ida ba kotuk hodi asesu ba informasaun ne’ebé relevante, haforsa no hametin Funsionáriu/a S.E.I nian responsabilidade, dignidade no integridade.” Dehan Sekretária Estadu ba Igualdade, Elvina Sousa Carvalho,
Nia hatutan oportunidade ne’e di’ak tebes importánsia atu hasa’e koñesimentu funsionáriu/a sira iha Sekretaria Estadu ba Igualdade (SEI). Koñesimentu kona-ba prosedimentus legais sira, no servisu husi Gabinete GIA rasik nomos hasa’e koñesimentu ba Funsionáriu/a Públiku sira kona-ba lala’ok loloos iha Administrasaun Públiku liga ho Jestaun Boa Governasaun, ba iha Administrasaun Públiku.
“Ha’u hanoin formasaun importante tebes tanba oradór/ora ba iha workshop refere la’ós husi GIA-SEI de’it, maibé husi Komisaun Funsaun Públiku, lori nia matéria rasik, sai hanesan momentu ida di’ak ba Funsiunáriu/a Kazuais Funsionáriu/a S.E.I nian atu hatene di’ak liután papél, hanesan funsionáriu/a husi Funsaun Públika bele hala’o kna’ar ho di’ak ho transparente, Integridade, prinsípiu lori ita ba Governasuan di’ak.” Dehan Sekretária Estadu ba Igualdade (SEI)
Nia hatutan iha ligasaun forte entre goveranasaun di’ak ho Igualdade Jéneru, (SEI) nia mandatu hodi asegura Promosaun Igualdade Jéneru no husi Funsionáriu/a Pesoal S.E.I, iha papél importante atu promove Governsaun di’ak ka Boa Governasaun bele hakonu Direitu Feto no Grupu Vulneravel sai hanesan alvu ba dezenvolvimentu no alvu ba ita-nia servisu.
“Husu ba partisipante sira hotu, atu uza oportunidade ida-ne’e ho di’ak ho oradores prinsipais mai partilla informasaun liuhusi KFP no KAK, hodi haforsa servisu GIA nian internalmente atu halo kontrolu no akompañamentu bele asegura.” Nia haktuir
Nia haktuir S.E.I hala’o nia servisu bazeia ba Lei ne’ebé iha, asegura transparánsia iha ita-nia servisu, asegura Governasaun di’ak iha ita-nia servisu, Jestaun di’ak, evita Jestaun ladi’ak no evita Korrupsaun, evita Administrasaun ladi’ak iha S.E.I rasik.
Iha fatin hanesan, Inspetora no Auditoria-SEI, Benigna Maria Amaral hateten, Gabinete Inspetora no Auditoria (GIA-SEI) liuhusi Planu Anuál S.E.I tinan 2025 nian no iha programa 5 no 10, Funsiunamentu no Dezenvolvimentu Institusionál no Sub-Programa Funsiunamentu Instituisaun.
“Atividade ne’e ko’alia kona-ba dezeminasaun no sosializasaun Lei no dekretu-Lei foun sira ba Funsionáriu/a sira iha S.E.I, ohin GIA-SEI organiza Kolókiu no halo Sosializasaun. GIA-SEI tinan-tinan sempre iha Planu atu halo Sosializasaun kona-ba Lei. Nune’e tinan ida-ne’e GIA hili tema ida ne’e hakarak atu fahe ba Funsiunáriu/a ho tema “ Jestaun no Governasaun Di’ak no Sub Tema “Kontrolu Internu.” Dehan Inspetora no Auditoria-SEI, Benigna Maria Amaral
Nia hatutan kolókiu refere fasilita mós informasun husi oradór/a prinsipál husi (KFP) ba Asuntu Responsável Portufóliu no Dezenvolvimentu Karreira Espesiais.
Esplika liután workshop ne’e partisipa husi estrutura S.E.I tomak ne’ebé kompostu husi, Diretores Jerais-SEI, Gabinete GIA-SEI, Xefe-Gabinete-SEI, Diretores Nasionais, Xefe-Departamentu, Pontu Fokál S.E.I Munisípiu no Funsionáriu/a S.E.I tomak.
Reportajen : Nelfiano
Foto : Media SEI