Dili, 6 Maiu 2025 (Média Democracia) – Embaixadora Portugal iha Timor-Leste konsidera katak lian portuges ne’ebé Timor-oan sira aprende hatudu progresu di’ak iha Timor Leste.
Iha entrevista ho Embaixadora Portugal iha Timor-Leste Manuela Bairos hateten, Loron Mundial Lian Portuges selebra tinan-tinan iha loron 5 fulan maiu iha área selebrasaun loron mundiál lian portugés nian ne’ebé organiza husi Embaixador Portugal iha loron Segunda, hodi halo Marsa hamutuk ho estudante sira ba iha Palasiu governu.
Nia hateten hanesan Embaixadora iha Timor-Leste hatene di’ak liu kona-ba dezafiu barak ne’ebé Timor-oan sira hasoru bainhira atu aprende lian Portugés, maibé Timor iha progresu boot iha lian ne’e.
“Iha ha’u nia relatóriu kona-ba lian portugés iha Timor-Leste, ha’u mai iha ne’e durante tinan 10 ona, ha’u hanoin katak iha progresu boot iha lian portugés iha Timor-Leste tanba iha Timor-oan barak komesa aprende no koalia ona lian portugés, no iha serbisu ne’ebé la hanesan tebes, tanba iha tempu uluk ema barak susar atu aprende portugés, maibe agora iha kursu oioin ne’ebé fasilita husi Timor-oan nomos estranjeiru atu bele hanorin portuges ba Timor-oan balun ne’ebé seidauk hatene lian portuges.” Lia-hirak ne’e hato’o husi Embaixadora Portugal Manuela Bairos iha ambitu selebrasaun liberdade imprensa iha Embaixada Portugal
Embaixadora hateten iha dezafiu barak atu aprende lian Portuges, maibé Governu Portugal la ta’uk atu halo investimentu bo’ot iha lian Portuges iha Timor-Leste atu nune’e Timor-oan sira bele aprende lian ne’e ho di’ak liu iha futuru.
“Ita sei la haluha katak iha dezafiu barak, no dezafiu sira ne’ebé ita hasoru daudaun ne’e liuliu ba jerasaun foin-sa’e sira ne’ebé seidauk iha hanoin atu aprende lian portuges, durante tempu Indonezia nian, sira seidauk iha kontaktu ho lian portugés, maibe sira aprende liu lian Indonesia nian entaun jerasaun foun sira ne’ebé atu aprende sei hahú husi zero relasiona ho lian ida-ne’e, ne’ebé ha’u hanoin katak la’ós lian ida-ne’ebé susar tebes tanba liafuan tetun barak kuaze atu hanesan ho lian portugés.” Nia dehan
Nia hatutan durante tinan sanulu hanesan Embaixadora Portugal ne’ebé reprezenta iha Timor-Leste haree ba iha lian portugés ne’e hatudu progressu ida ne’ebé kapas tebes, tanba ema hotu bele aprende lia portugués iha fatin ne’ebé deit.
“Ha’u fó ezemplu balun hanesan lian portugés ne’ebé hanorin husi CLJ ba iha jornalista Timor-oan sira, iha mós eskola portugés ne’ebé loke iha Timor-Leste ba estudante sira, iha mós kursu balun ne’ebé loke husi maluk Timor-oan sira atu hanorin fali maluk balun ne’ebé seidauk hatene lian portugés, ida ne’e hanesan progresu ne’ebé hatudu durante iha nasaun ne’e, tanba ne’e embaixadora nafatin husu ba estudante sira aprende lian ne’e hodi dezenvolve diak liu iha future.” Hatutan Embaixadora Portugal
Nia salienta loron 5 maiu hanesan loron mundial ba lian Portugés ne’e deside ona iha tinan 2009 husi komunidade lian portugés no depois konfirma iha tinan 2019 husi Organizasaun Nasoins Unidas Edukasaun, Sientifika no Kultural, ne’ebé sai hanesan data ofisiál iha kalendáriu Nacoes.
Reportajen : Domingas
Foto : Domingas