Dili, 13 Maio 2025 (Media Democracia) – Asosiasaun Akademia Estudantil Fakuldade Medicina Siensia Saúde hamutuk ho Senadu fakuldade nain-ualu hala’o konferensia imprensa relasiona ho aktu dosente no dekana fakuldade medicina organiza estudante parteira sira halo impedementu ba asaun ne’ebé hala’o husi Asosiasaun Estudantil Fakuldade Medicina Siensia Saúde.
Iha introdusaun husi Senadu Jeral UNTL Cesar João hateten Primeiru aproveita espasu ida ne’e hato’o lametasaun liuliu ho konferensia imprensa ne’ebé horseik hala’o iha Fakuldade Medicina Siensia Saúde ne’ebé hetan intervensaun husi dosente balun no AAE-UNTL mós lamenta ho atuasaun no intervensaun husi Polisia Nasional Timor-Leste PNTL ho Batalão Ordem publiku BOP ne’ebé horiseik marka prezensa iha kampus Faspol hanesan presaun ba estudante sira iha Fakuldade Medicina Siensia Saúde kaikoli.
Iha komunikadu ne’ebé hato’o husi porta-voz Asosiasaun akadémika estudantil-UNTL Ronaldo J.G dorego, konstitui nu’udar organismu ida ne’ebé representa estudante hotu hodi defende direitu no interese estudante hotu nian liuhusi halo kordenasaun iha nivel Fakuldade no Universidade, iha ne’ebé hatur ona iha estatutu asosiasaun nian no estabelese iha universidade liuhusi konsellu jeral UNTL. Ho ida ne’e, mak relasiona ho problema ne’ebé akontese iha Fakuldade Medicina Siensia No Saúde ne’ebé fó sai ona ba publiku iha dia 29 abril 2025, iha neʼebé prátika husi Diretor parteira ESTES, ne’ebé publiku akompanha ona iha media sira.
“Problema sira ne’e hotu, mak liuhusi asosiasaun akademika Estudantil Fakuldade Medicina Siensia no Saúde, aproxima no kordena ho estrutura fakuldade liuhusi karta dialogu ka enkontru no apresenta ona ba magnifiku Reitor UNTL, maibé sira la tau konsiderasaun atu rezolve, nune’e to’o agora seidauk iha resultadu positivu ruma ne’ebé afavor ba resolve problema estudante sira hasoru parte estrutura Universidade nian.” Dehan Porta-vos Ronaldo J.G dorego
Porta-voz hatutan, infelismente iha loron 12 fulan maiu 2025 horiseik, bainhira Asosiasaun Akademika Estudantil Fakuldade Medisina Siensia no Saúde, realiza hela konferensia ba dalarua iha kampus medicida kaikoli Dili, iha ne’ebé hetan impedimentu husi estudante parteira ne’ebé orienta husi Dekana Fakuldade Medicina Siensia Saúde Durante konferensia hetan mós intervensaun husi Dosente balun, nune’e nia konvida Policia Nacional Timor-Leste no Batalão Ordem Publico (BOP), tama mai iha kampus atu halo intervensaun ba asaun ne’ebé organiza husi Senadu Fakuldade FMCS.
“Ho aktu hirak ne’ebé akontese iha Fakuldade Medicina Siensia Saúde ne’e rasik maka, Senadu estudantil UNTL deskorda ka lamenta tebes ba hahalok Dekana nian ne’ebé orienta estudante parteira atu impede asaun greve ho objetivo atu resolve problema.” Hatutan Porta-vos iha konferensia imprensa
Ho razaun hirak ne’e mak Asosiasaun Akademika Estudantil UNTL konsidera katak:
- Dekana Fakuldade FMCS, la iha kapasidade, seriedade no renponsabilidade morál, nune’e nia orienta no forma deit estudante feto sira hodi impede asaun greve bainhira asosiasaun estudantil halo hela konferensia refere.
- Ami lamenta mós ho aktu husi profesora ne’ebé la iha kompetensia iha estrutura Fakuldade FMCS, maibé nia impede no konvida PNTL no BOP hodi tama iha kampus Caicoli, maske Universidade ne’e jere-nia autonomia rasik tuir prinsipiu no valores fundamentais ne’ebé vinkula ho ninia regra rasik.
- Ita hotu hatene katak UNTL nu’udar kampus autónoma ka independentenente husi kualker presaun aparelu estadu nian, exeptu iha indisius krime ne’ebé grave ka perturbasaun ba funsionamentu universidade, maibé sira hatama polisia tuir sira nia gostu no vontades.
Asosiasaun Akademia Estudantil Fakuldade Medicina Siensia Saúde husu ba :
- Husu ba Magnifiku Reitor, atu fó xamada atensaun ba aktu sira refere no loke ka instaura ona prosesu disiplinar ba kazu ne’ebé estudante FMCS hasoru perante Fakuldade. Iha ne’ebé aprezentasaun keixa husi Senadu FMCS iha ona gabinete Magnifiku Reitor nian.
- Karik Magnifiku Reitor la halo ida ne’e, mak ami husu ba Prezidenti Konsellu Jeral UNTL hodi hola mós intervensaun no medidas ruma ba problema sira ne’ebé akontese ona iha Fakuldade FMCS
- Ami mós solisita ba Ministeriu Ensinu Superior, atu bele rekomenda no propoin solusaun ruma ba estrutura universidade hodi rezolve problema sira ne’ebé akontese ona.
- Ami husu mós ba Parlamentu Nasional liu-liu komisaun G ne’ebé trata asuntu edukasaun hodi hola mós intervensaun sira tuir kompetensia ne’ebé iha atu garante funsionamentu retangular instutuisaun públiku hodi lao tuir regra ne’ebé hatur ona.
- Husu mós ba PDHJ ne’ebé nu’udar instituisaun indepedente ida atu hola mós intervensaun ligadu ho violasaun direitus umanus iha kampus universitariu, no husu mós sosiedade sivil sira atu halo mós kontrolu ba problema sira ne’ebé buras iha universidade tuir prinsipiu estadu direitu demokratiku.
- Ikus liu mak husu ba komandu PNTL Munisipiu Dili, atu labele orienta ekipa ka oknum PNTL hodi tama iha kampus arbitrariamente, no husu mós ba komisariu Jeral PNTL no Ministeriu Interior, atu orienta formasaun unidade juridika partikularmente iha ambitu atuasaun PNTL nian iha terenu.
Reportajen : Domingas
Foto : Domingas