Dili, 19 Maiu 2025 (Média Democracia)– Iha entrevista ho Joventudi Rejistensia hanesan mós sarani husi parokia letefoho José Foka, deklara katak rejiaun kuatru sura mós luta husi Padre Domingos da Silva Soares ne’ebé koñesidu ho naran Amu Domingos Maubere iha tempu luta to’o mai agora no fulan ne’e nia hakotu ona nia peregrinasaun iha mundu.
Nia dehan hanesan joven ba iha rejistensia iha tempu luta ba iha ukun rasik-an iha prosesu tomak sempre hamutuk hodi luta hasoru inimigu sira nomos iha tempu ne’ebá Amu Domingos koñesidu ho naran “Maubere” hanesan joven Timor uluk la tauk atu mate hodi hamrik firme hodi luta ba independensia.
“Uluk iha luta ami maka hamutuk deste tempu uluk hetan esperensia barak husi Amu Maubere tanba Amu Maubere ne’e inspira joventude Timor-Leste tomak tantu joventudi rejistensia nomos intelektual sira atu nafatin hamrik firme hodi luta, ami hanesan joventudi rejistensia 12 novembru nian ne’ebé ikus tama kadeia balun mate iha kadeia, ami balun sei moris tanba ami brani lori inspirasaun husi Amu Maubere nia liafuan.” Dehan Joventudi Rejistensia José Foka
Nia hatutan, hein katak iha futuru iha lider balun bele troka fali Amu Maubere nia fatin atu bele halo transformasaun ideia nafatin ba joventudi sira, nune’e joventudi sira tenke aten brani hodi hamrik ba iha dezenvolvimentu nasaun Timor-Leste.
“Ita-nia estadu no igreja katolika presiza tebes lider hanesan Amu Maubere ho karakter akumulativu tanba ne’e ha’u bele dehan katak rejiaun kuatru hamrik konta mós ho Amu Maubere nia luta iha pasadu, tanba nia iha papel extra-ordinariu ba iha libertasaun nasional iha loron 12 novembru reinstala fali rejiaun kuatru ne’e ita-nia lider sira hanesan Xanana, Nino Konis Santana hamutuk ho Amu Maubere diskute kona-ba futuru Timor ninian. Uniku dalan papel igreja nian maka ne’e liberta povu hamutuk ho lider rejistensia sira ho opsaun ida ne’ebé haree husi tinan 1980 fila husi portugal no Amu Maubere sai Amu paroku iha Munisipiu Viqueque.” Hatutan Joventude Rejistensia
Nia subliña Amu Domingos Maubere sempre iha komitmentu no sempre fó hatene ba iha joventude sira katak joventude tenke iha amizade unidade nomos tenke iha responsabilidade, tanba Amu Maubere hatene katak joventude Timor-Leste ema ne’ebé la tauk mate nomos iha responsabilidade boot ba dezenvolvimentu nasaun ida ne’e.
Reportajen : Domingas
Foto : Domingas