Dili, 19 Maiu 2025 (Média Democracia) – Ministeriu Administrasaun Estatal MAE Tomas Cabral deklara atividade ba selebrasaun loron restaurasaun independensia sei halo iha palasiu prezidensial nomos preparasaun ba atividade refere prontu ona.
Nia dehan Atividade ba iha selebrasaun loron restaurasaun independensia ne’e sei hala’o iha palasiu prezidente aitarak laran, entaun autoridade munisipal Dili nian mak sei haree, no iha selebrasaun loron independensia ne’e iha parte lokraik sei halo abertura husi Prezidente Republika ba expozisaun governasaun lokal iha area portu Dili.
“Husi expozisaun ne’e ita bele hatene durante tinan ida ho balun ona iha Munisipiu sira ne’e halo ona servisu saida no haree mós ba iha governu sentral sira ne’e fó kompetensia ka delega ema sira ba servisu iha Munisipiu ne’e sira tuir ba fó asistensia teknika ba ema sira ne’e kalae, tan ne’e maka expozisaun refere iha hodi haree ba iha servisu sira ne’ebé durante ne’e hala’o ona iha Munisipiu sira.” Dehan Ministeriu Administrasaun Estatal MAE Tomas Cabral
Nia hatutan serimonia ne’ebé sei selebra iha loron 20 fulan maiu ne’e serimonia simples deit tanba governu sei prepara ba iha serimonia ne’ebé sei mosu iha loron 28 fulan novembro tinan ida ne’e, tanba aniversariu dala limanulu ne’e sei hala’o iha proklamasaun independensia Timor-Leste.
“Iha serimonia ba loron proklamasaun independensia Timor-Leste nian ne’e sei partisipante husi ema internasional, tan ne’e maka ohin ha’u dehan ona katak serimonia ba iha selebrasaun loron restaurasaun 20 maiu ne’e simples deit, tanba governu sei foka liubá serimonia proklamasaun nian. Iha selebrasaun ba loron 20 maiu nia ne’e ita sei iha mós kompetisaun hanesan dansa kultural nomos musik kultural husi Munisipiu sira.” Hatutan Ministru Administrasaun Estatal MAE
Nia reafirma kompetisaun ba iha dansa kultural nomos musik kultural ne’e ba grupu ida ne’ebé hetan kategoria diak sei tama hotu ba iha kompetisaun tuir mai, ne’ebe sei halo iha loron proklamasaun nian inklui mós iha nivel internasional sira ne’ebé sei partisipa hotu iha kompetisaun refere.
“Haree ba orsamentu alokasaun global deit ne’e signifika katak governu aloka osan sira ho globalmente haree hotu ba iha serimonia sira hanesan selebrasaun loron 20 maiu, selebrasaun 30 agostu, selebrasaun 28 de novembru nomos iha 31 de dezembru nian.” Reafirma MAE Tomas Cabral
Esplika liután katak, orsamentu global ne’ebé iha ne’e bazea ba planu realizasaun loron selebrasaun Timor-Leste nian iha tinan 2025, tanba atividades sira ne’ebé atu hala’o ne’e importante tebes ba nasaun Timor-Leste.
Reportajen : Domingas
Foto : Domingas