Dili, 20 Maiu 2025 (Média Democracia) – Timor-Leste Komemorasaun Aniversariu Loron Restaurasaun Independensia 20 de Maiu ba dala-23, iha diskursu Prezidente Repúblika relembra hikas lia menon Amu Papa nian bainhira mai vizita Timor-Leste iha fulan setembru 2024, Atividades komemorasaun aniversariu hala’o iha Palasiu Prezidente Aitarak-laran Dili.
Prezidente Repúblika, José Ramos Horta iha nia diskursu hateten, ohin selebra loron Restaurasaun Independénsia 20 de Maiu ba dala-23, hakarak hakru’uk ho reverénsia kle’an iha Memória Sua Santidade, Amu-Papa Francisco nia oin ida-ne’ebé ba Timor-Leste no ba mundu.
“Amu Papa nia prezensa iha ita-nia leet, iha fulan-setembru 2024, sai prezente folin-laek ida, hanesan mina-morin midar ida ne’ebé hela nafatin, ninia liafuan sira kontinua fó-lian iha povu Timoroan nia fuan, hametin ita iha fiar, inspira ita iha esperansa no enkoraja ita iha justisa no rekonsiliasaun. Ha’u hanoin ho emosaun partikulár mensajen sentrál husi nia vizita, simples hanesan mós transformativu “Imi-nia Fiar sai imi-nia Kultura.” Deskursu Prezidente Repúblika, José Ramos Horta
Presidente hatutan liafuan sira-ne’e, Amu-Papa Francisco dezafia Timoroan atu la ta’uk kesi Evanjellu ho klamar kle’an ita-nia identidade nian, atu sai “perfume Evanjellu nian iha rai ida-ne’e” Amu Papa hateten perfume rekonsiliasaun nian, dame nian, kompaixaun nian, justisa nian.
“bainhira ita selebra tinan ida tan ita-nia Restaurasaun Independénsia nian, ita hetan inspirasaun husi legadu espirituál no morál ida ne’ebé husik hela husi Sua Santidade, ita-nia komprimisu atu fiar la’ós de’it refujiu ida, maibé sai forsa moris no transformadora ba konstrusaun sosiedade ida ne’ebé umanu, justu no solidáriu liu.” Dehan Prezidente Repúblika
Prezidente afirma desizaun sira-ne’e iha signifikadu espesiál bainhira observa tuir roman personalidade no perfil Sua Santidade Papa Leão XIV nian. Ninia eleisaun, rezultadu husi desizaun matenek no ponderadu husi Koléjiu Kardeál sira-nian, reprezenta eskolla suprendente ida ba analista no observadór sira husi vida Igreja nian.
“Ida-ne’e hatudu kle’an katak koerente tebes ho misaun milenar Santa Sé nian. Pontífise foun reafirma ona, ho klareza no determinasaun, sentralidade doutrina sosiál Igreja nian, hodi tau karidade sarani, justisa no atensaun ba sira ne’ebé haraik-an no vulneravel liu iha sentru ninia asaun pastorál.” Dehan Prezidente
Prezidente informa iha tempu ne’ebé mundu parese mout iha nakukun laran marka ho violénsia, konflitu no lakon valór espirituál sira liafuan no jestu sira husi Sua Santidade Papa Leão XIV mak fonte esperansa.
Esplika liutan hanesan Papa Francisco dehan, ita-nia moris iha mundu desakralizadu, ne’ebé dalabarak domina husi “Ema funu nian” maibé fó kmaan atu hatene katak ita la’ós oan-kiak iha ita-nia fiar no iha rai-rahun sofrimentu nia leet, naroman domin nian ba ita-nia maluk moris nafatin, hafoun iha figura Sumo Pontífise foun nian.
Reportajen : Nelfiano
Foto : Nelfiano