Dili, 21 Maiu 2025 (Média Democracia) – Prezidente Repúblika, halo diskursu iha komemorasaun aniversariu loron nasional restaurasaun independénsia 20 Maiu ba dala ruanulu-resin-tolu 23, hato’o sentidu kondolensia ba Amu Maubere nune’e nia klamar hodi hamutuk ho Aman Maromak.
Prezidente da Republika, José Ramos Horta hateten, Padre Domingos Maubere (Amu Du) labele husik atu hatudu iha tempu selebrasaun ida-ne’e, koinsidénsia ne’ebé todan ho partida atu hamutuk ho Maromak Ita-nia Na’i, husi saudozu Padre Domingos Soares, koñesidu hanesan Padre Maubere ka “Amu Du”
“Ha’u iha priviléjiu koñese pesoalmente Padre Maubere no mantein relasaun amizade kle’an ho nia, ne’ebé marka ho proximidade no diálogu konstante iha tinan barak nia laran. Ha’u hanoin hikas ho emosaun frekuénsia ami-nia kontaktu sira-nian no ninia liafuan sira ne’ebé sempre fó korajen, ne’ebé dirije ba ha’u-nia misaun públika no servisu ba bem-komún.” Dehan Prezidente Republika
Prezidente da Republika hatutan hanoin hikas dilijénsia no persisténsia ne’ebé nia halo nia apelu sira hotu sempre hato’o liuhusi mensajen sira WhatsApp nian hodi bolu atensaun ba realidade todan sira ne’ebé esperiénsia husi ema sira ne’ebé vulneravel liu ema kiak sira, ema moras sira, ema eskluidu no sira ne’ebé terus iha silénsiu nia laran.
“Padre Domingos Maubere halo denúnsia no ezijénsia, ba sira ne’ebé laiha lian nia naran, hodi husu intervensaun Prezidente Repúblika ka Governu nian atu hakmaan Timor-oan barak tebes ne’ebé hasoru ki’ak, malnutrisaun, eskluzaun sosiál no falta oportunidade iha moris. Ne’e sein-dúvida, figura únika no laran-luak, ne’ebé ohin loron ita hanoin ho agradesimentu kle’an.” Dehan Prezidente Republika
Nia hateten, iha biban ne’e mós hakarak destaka ninia papél fundamentál hodi organiza Sorumutuk Konsellu Nasionál Rezisténsia Timorense (CNRT), ne’ebé hala’o iha Peniche, Portugál, iha tinan 1998, enkontru ida ne’ebé marka unidade no reafirmasaun ba ita-nia povu nia luta ba autodeterminasaun no dame.
“Padre Domingos Maubere nia dedikasaun desiziva no reflete aliansa kle’an entre Igreja Katólika no kauza Libertasaun Nasionál Timor-Leste nian, nune’e mós kompromisu metin atu harii sosiedade ida ne’ebé bazeia ba justisa, dignidade umana no rekonsiliasaun.” Prezidente Republika hateten
Nia ohin aproveita tempu ida ne’e atu hanoin hikas no reflete ba Amu Domingos Maubere nia didikasaun tomak durante ne’e luta ba Igreja katolika no kauza Libertasaun Nasionál Timor-Leste nian tuir komprimisiu ne’ebé atu harii tuir justisa no dignidade umana iha rai laran.
Esplika liután, bainhira ita evoka nia memória, hafoun ita-nia kompromisu ba valóres di’ak tomak sira ne’ebé nia moris no luta ba. Atu “Amu Du” bele deskansa ho hakmatek iha kadunan santu, hamutuk ho Aman Eternu, ida ne’ebé hadomi tebes nia povu.
Reportajen : Nelfiano
Foto : Media Sosial FB