Dili, 23 Maiu 2025 (Média Democracia) – Konsellu Imprensa realiza konferensia imprensa kona-ba anunsiu data ba jornalista sira ne’ebé atu tuir kompetisaun iha 16 outubru 2025 ba loron Liberdade Imprensa iha Balibo Five, Konferensia ne’e hala’o iha salaun Konsellu Imprensa kintal boot Dili.
Iha konferensia imprensa husi Prezidente Konsellu Imprensa Otelio Ote hateten, ohin Konsellu Imprensa anunsiu premiu média 2025, nu’udar anual ba tinan ida ne’e nian sempre atribui premiu ba jornalista sira iha loron nasional liberdade imprensa iha 16 fulan outobru kada tinan.
“Tinan ida ne’e nafatin utiliza kategoria premiu sira ne’ebé tinan kotuk ami halo ona maibé iha tinan ida ne’e diferente oituan tanba iha espesialidade ida ne’ebé Asosiasaun Jornalista Timor-Leste entrega premiu balibo five nian ba fali Konsellu Imprensa atu bele sai nain ba iha eventu ida ne’ebé sei realiza iha Balibo Five, tanba Konsellu Imprensa ho AJTL konsiente katak premiu Balibo Five ne’e premiu ne’ebé ho valor as, tanba ne’e mak nia fatin lolos tenke tau iha Konsellu Imprensa.” Dehan Prezidente Konsellu Imprensa Otelio Ote
Nia hatutan kriteria ba jornalista sira ne’ebé atu mai hatama nia produtu jornalistiku hanesan tenke jornalista sidadaun Timoroan, tenke iha karteira profisional husi Konsellu Imprensa, produtu ne’ebé jornalista atu mai hatama iha komisaun ne’e tenke publika ona iha média ne’ebé nia serbisu ba nomos kriteriu seluk mak jornalista ne’ebé ativu iha média no area kobertura nian.
Nia reinforma kategoria ba kompetisaun ba iha eventu ne’ebé sei realiza iha Balibo Five mak hanesan :
- Kategoria premiu mak the best of the best
- Kategoria premiu ba adelino gomes mak reportajen sira ne’ebé uza lian portuges ho di’ak.
- Kategoria premiu ba fransisco borja da costa jornalista sira ne’ebé hakerek obra kona-ba issu interesante sira ba ema humanu nian.
- Kategoria premiu greatsakelestore Konsellu Imprensa sei entrega ba jornalista elektroniku sira ne’ebé iha produtu jornalistiku di’ak liu no ida seluk ami sei entrega primiu bernadino gomes hanesan premiu ida ne’ebé jornalista sira hala’o produtu jornalistiku kategoria fotogratiku kualidade di’ak liu.
“Ohin ita halo ona abertura ba iha kompetisaun premiu ba iha jornalista sira ba tinan ida ne’e Konsellu Imprensa ho AJTL hakarak konvida jornalista sira nomos média nain sira atu motiva jornalista sira hatama produtu jornalistiku sira ba iha komisaun organizadora sira, ne’ebé sei anunsiu nia kalendariu liuhusi portal Konsellu Imprensa nian, entaun husu ba média nain sira atu motiva jornalista sira hodi uza oportunidade ida ne’e atu hatama sira-nia produtu mai iha komisaun atu nune’e bele tuir kompetisaun premiu ba jornalista tinan ida ne’e iha Balibo Five.” Reafirma Prezidente Konsellu Imprensa Otelio Ote
Nia hatutan premiu ida ne’e importante tebes tanba atu identifika no fortifka jornalista Timoroan sira ne’ebé iha kualidade ba iha nia produtu rasik ida ne’ebé profisionalidade no kualidade di’ak iha area jornalistiku nian, premiu ida ne’e la fó valor ba ema individu maibé fó mós valor ba iha média ne’ebé jornalista sira servisu ba.
Hatutan husi Asosiasaun Jornalista Timor-Leste AJTL Acasio pinto hatete, AJTL entrega premiu ho naran Balibo Five ba Konsellu Imprensa tanba premiu ne’ebé ohin temi ona ne’e naran historiku, tanba ne’e AJTL entrega ba iha KI atu nune’e bele hala’o eventu ho di’ak.
“Diskusaun naruk ne’ebé ami hala’o ona no deside entrega premiu ne’e ba Konsellu Imprensa atu sai hanesan premiu ida ne’ebé di’ak liu no atu bele valoriza obra jornalista sira nain lima ne’ebé mate ona no husi obra hirak ne’e Timor-Leste bele kria amizade di’ak liu ho nasaun Australia, tanba ita kada tinan sempre selebra Balibo Five.” Dehan Asosiasaun Jornalista Timor-Leste AJTL Acasio pinto
Nia hatutan AJTL mós kontribui makas iha ezistensia ba iha KI nian, tanba husi premiu Balibo Five ne’e AJTL hala’o diskusaun kle’an ho Konsellu Imprensa no AJTL deside katak premiu Balibo ne’e AJTL fó ba Konsellu Imprensa.
Reportajen : Domingas
Foto : Domingas