Dili, 03 Juñu 2025 (Média Democracia) – Diresaun Nasionál Servisu Rejistu Notariadu submete ona Pedidu akizasaun bá Ministériu Justisa hodi preve orsamentu sosa kaderneta pasaporte hamutuk rihun hitunulu resin-lima iha tinan 2026.
Iha entrevista ho Diretór Jerál Servisu Rejistu Notariadu Agostinho Gonçalves Vieira hateten, DNSRN solisita ona pedidu ba Ministériu Justisa (MJ) atu halo tan akizisaun ba kaderneta pasaporte nian iha tinan oin.
“Pedidu ba tinan 2026 Ministériu Justisa hodi tau osan ba pasaporte hamutuk rihun hitunulu resin-lima no Ministru Justisa mós aseita ona katak ita sei halo tan akizisaun ba pasaporte.” Dehan Diretor Jeral Servisu Rejistu Notariadu Agostino Gonçalves Viera iha nia kna’ar fatin, Kolmera, Tersa-feira (03/06/2025)
Nia hatutan, Pedidu ne’e husi parte Notariadu husu osan millaun ida, maibé depende bá desizaun Ministériu Justisa, no espera katak osan sei koloka tuir pedidu ne’e, maibé haree ba iha stock pasaporte agora sei sufiente hela, bele sutenta to’o fulan dezembru no pedidu ne’ebé hatama ona ne’e ba iha tinan oin nian.
“Ha’u la hatene kaderneta pasaporte ne’e falta hira maibé ha’u bele dehan katak sei ba atendementu halo pasaporte nian ne’e bele to’o fulan Dezembru tinan ida ne’e hodi hein foun ne’ebé mai tan.” Dehan nia
Diretor Jerál ne’e garantia katak Governu sei aseita ba iha pedidu ne’ebé hato’o ona ho akizasaun ne’e, tanba ida ne’e preve bá orsamentu jerál estadu 2026 ninian.
Reportajen : Domingas
Foto : Domingas