Dili, 05 Juñu 2025 (Média Democracia) – Ministeriu Negósius Estranjeiru no Kooperasaun MNEK hala’o enkontru bilateral ho delagasaun husi nasaun Moçambique ne’ebé husi Ministru Justisa Moçambique nian nomos ho ekipa delegasaun sıra hodi diskute no haree liubá lasu amizade entre pais PALOP-TL.
Ministru Negosius Estranjeiru no Kooperasaun (MNEK) Bendito dos Santos Freitas dehan, ohin iha MNEK kontinua sesaun konferensia Ministerial ba da-15 iha Timor-Leste PALOP-TL, ohin ne’e enkontru bilateral entre Ministru Justisa husi Moçambique ho ekipa Sekretariu Estadu ba Asuntu Negosiu Estranjeiru nian husi nasaun Kabu Verde, Moçambique, São Tome Prinsipe, Angola, nune’e atu konsolida no reforsa liután lasu amizade entre pais PALOP-TL sira.
“Importante tebes ita-nia relasaun istoriku ne’ebé kleur, atu lembra katak iha tinan kotuk, ami ho ita-nia Xefe Estadu Jose Ramos Horta, vizita ba Maputu, iha ne’ebá konsolida liután ita-nia relasaun pais.” Ministru ne’e informa hafoin remata enkontru ho nia omologu Ministru Justisa Maçambique, iha sala MNEK Praius do Coqueiro Dili.
Nia dehan Moçambique ho TL iha nia istoria ligasaun espesial no enkontru bilateral ne’ebé iha akordu sira asina tiha ona, agora iha ne’e enkontru teknikamente sira deside para bele haree mekanizmu konsultasaun politika asuntu sira seluk ne’ebé bilateral sai importante ba TL.
“Hanesan imi hotu hatene governu TL servisu maka’as, apartir fulan Abril mai ne’e iha eventu internasional barak la’o iha TL, enkontru sira ne’e hatudu konfiansa no kredibilidade TL nian iha mundu, ba politika esterna, diplomasia no multilateralizmu.” Dehan Ministru Negosius Estranjeiru no Kooperasaun (MNEK) Bendito dos Santos Freitas
Atu hametin kooperasaun sira, mundu agora hasoru dezafiu oin-oin, TL nia kooperasaun rejional barak importante, tanba TL tama ba ASEAN ofisialmente Timor mós prepara iha mundu ne’ebé ligadu ho CPLP no PALOP, servisu maka’as nafatin ho Uniaun Europeia, no pais sira seluk, para bele garante dezenvolvimentu ba povu, atu kumpre objetivu dezenvolvimentu sustentavel nomos asuntu sira seluk.
Iha fatin hanesan Ministeriu Justisa husi nasaun Moçambique Mateus da Cecilia Finiasse Saize hateten, ohin sira mai hala’o inkontru bilateral ida ho nasaun Timor-Leste hanesan nasaun europeia liuhusi kooperasaun ida ho norte sul no sira mos komprende kona-ba prinsipiu kooperasaun nian haree liubá nasaun sira ne’ebe iha ona CPLP nian laran.
“Iha ambitu ne’e ami mai iha Ministeriu Negósius Estranjeirus iha Timor-Leste atu aprezenta kona-ba disponsabilidade husi Moçambique ba iha kooperasaun nian, ita hatene katak iha pasadu iha ona asina memorandu ida ne’ebé husi prezidente iha ambitu vizita mai iha republika Timor-Leste nian.” Dehan Ministeriu Justisa husi nasaun Moçambique Mateus da Cecilia Finiasse Saize
Nia dehan iha ambitu ida ne’e atu halo verifikasaun, ba iha memorandu ne’ebé asina ona husi Ministeriu Negósius Estranjeiros nian haree liubá iha boakooperasaun nian, no nasaun Moçambique sempre iha disponibilidade atu halo kooperasaun servisu ida ne’ebé di’ak liu ho nasaun Timor-Leste atu haree ba dezenvolvimentu iha nasaun ne’e.
Reportajen : Domingas
Foto : Domingas