Dili, 09 Juñu 2025 (Média Democracia) – Embaixada Xina AiD hamutuk ho UNICEF entrega bee tanki hamutuk 25 ba Bee Timor-Leste BTL,EP nune’e bele responde ba komunidade sira iha Munisípiu haat liu-liu iha area inundasaun no rai monu, atividade ne’e hala’o iha Armajen Ministeriu Obras Publika, Colmera Dili.
Embaixadora Republika Xina, Wang Wenli hateten, ho haksolok tebes tanba ohin bele partisipa iha serimónia hodi entrega no fornese lote tanki fornesimentu bee ba Bee Timor-Leste (BTL, E.P.) hodi fasilita komunidade sira iha Timor-Leste.
“Ha’u lori governu Xina nia naran hato’o ha’u nia agradesimentu ba BTL,Ep ne’ebé fó ona apoiu ba projetu ne’e, nomos agradese ba Gabinete Reprezentativu UNICEF nian iha Timor-Leste ba nia profisionalizmu no organizasaun ne’ebé efisiente durante implementasaun projetu ne’e.” Dehan Embaixadora Republika Xina, Wang Wenli
Embaixadora hatutan bee mak fonte moris nian ba labarik sira, ba inan feto sira, no komunidade tomak, asesu ba bee ne’ebé seguru no moos laos de’it kestaun saúde nian maibé mós kestaun ida kona-ba dignidade, oportunidade no ba futuru.
“Menus bee no infraestrutura ne’ebé fraku bele impaktu maka’as dezenvolvimentu sosiál no aumenta vulnerabilidade grupu desfavoresidu sira hanesan labarik sira. Hafoin entrega tanke bee hirak ne’e sei distribui no monta iha Munisípiu hanesan Ainaro, Baucau, Dili, no Ermera.” Dehan Embaixadora
Nia afirma sira sei la fornese de’it ba komunidade lokál sira ho rezerva bee moos ne’ebé seguru, estável no fasil atu jere maibé mós marka pasu sólidu ida ba atinjimentu Objetivu Dezenvolvimentu Sustentável Nasoins Unidas nian (ODS) kona-ba “asegura asesu ba bee no saneamentu ba ema hotu.
“Xina no Timor-Leste iha amizade di’ak no ligasaun polítika ne’ebé metin. Desde estabelesimentu relasaun diplomátika, nasaun rua ne’e hetan rezultadu kooperasaun ne’ebé signifikativu iha área oioin inklui agrikultura, infraestrutura no kuidadu saúde.” Nia afirma
Nia haktuir Xina sempre kuidadu no fó apoiu ba Timor-Leste iha nia esforsu atu dezenvolve infraestrutura no hadi’a povu nia moris di’ak. Ho apoiu husi Fundu Dezenvolvimentu Globál no Kooperasaun Súl, Xina sei kontinua koopera ho UNICEF iha ámbitu projetu nian hodi fornese bee no ekipamentu purifikasaun ba ema no komunidade sira iha Timor-Leste.
Representante UNICEF, iha Timor Leste, Patrizia Di Giovanni informa, bemvindu ba imi hotu iha okasiaun importante ida ne’e, tamba iha fatin ida ne’e sei entrega tanki bee hamutuk unidade 25, ida-idak ho nia kapasidade 5,200 litrus atu apoio ba komunidade sira ne’ebé afetadu husi inundasaun no rai monu, ne’ebé akontese iha 2021.
“Iha Abril 2021, ita haree inundasaun ne’ebé akontese makaas iha fatin hotu-hotu. Kauza husi siklone Seroja, inundasaun makaas ne’ebé akontese iha territóriu laran tomak, halo populasaun barak mak evakua ba fatin refuziadu sira no kauza infrastruturas barak mak aat, halakon sistema bee nian, liu-liu iha Dili, Baucau, Ainaro no Ermera.” Dehan Representante UNICEF iha Timor Leste, Patrizia Di Giovanni
Nia informa destrusaun ida ne’e hamosu ameasas seriu ba labarik ho familia sira-nia saúde no seguransa, tanba kontaminasaun bee no halo komunidade balun la hetan asesu ba bee moos. Tinan haat hafoin akontesimentu, komunidade balun seidauk asesu nafatin ba sistema bee ne’ebé regular, sistema bee hetan estragus, familia barak mak iha risku hetan moras tanba sira-nia presiza loron-loron depende ba bee ne’ebé kontaminadu.
Iha sorin seluk Prezidente Bee Timor-Leste BTL.EP, Gustavo da Cruz hateten, atividade ohin realiza seremonia Embaixadora Xina hamutuk ho UNICEF iha Timor-Leste entrega tanki unidade 25 mai iha Bee Timor-Leste.
“Apoiu ne’e hetan kooperasaun husi Governu Xina nomos UNICEF, tuir lolos apoiu iha 2021 nia laran kuan ita akontese inundasaun, maibé tanba buat hotu liuhusi prosesu ohin konsege entrega tanki ne’e sei distinadu ba iha Munisípiu haa hanesan Dili, Baucau, Ainaro no Ermera maibé ne’e laos ba inundasaun nian de’it haree mós eventu estrimin liga mudansa klimatika.” Dehan Prezidente Bee Timor-Leste BTL.EP, Gustavo da Cruz
Nia hatutan maibé durante ne’e iha tinan kotuk UNICEF iha Timor-Leste apoiu mós tanki hanesan hamutuk 85 mai Timor-Leste hodi resposta ba problema elninu ne’ebé akontese iha Munisípiu hanesan Manufahi, Likisa, Aileu, Bobonaro no Lautem.
Esplika Prezidente Bee Timor-Leste BTL.EP, atividade ohin realiza seremonia Embaixadora Xina hamutuk ho UNICEF iha Timor-Leste entrega tanki unidade 25 mai iha Bee Timor-Leste nune’e bele fornese ba komunidade sira iha Munisípiu Dili, Baucau, Ainaro no Ermera ne’ebé durante ne’e hasoru inundasaun no tempu bailoro naruk.
Reportajen : Nelfiano
Foto : Nelfiano