Dili, 24 Juñu 2025 (Média Democracia) – JSMP Timor-Leste realiza komunikadu imprensa hodi kongratula Tribunal Judisial Primeira Instansia Baucau, tanba komunika interviente sira antes halo adiamentu ba julgamentu leitura desizaun, komunikadu ne’e Média Democracia asesu liuhusi pajina ofisial JSMP iha tersa semana ne’e.
Diretóra Ezekutiva JSMP, Ana Paula Marçal hateten, iha 12 Juñu 2025, Tribunál Judisiál Primeira Instánsia Baucau halo adiamentu ba julgamentu leitura desizaun ba krime iha konkursu ne’ebé envolve krime violasaun seksuál, koasaun seksuál, arma brankas, danu simples no ameasa ne’ebé akontese iha Munisípiu Lautem ho Nú. Prosesu. 0027/23, halo mós adiamentu ba krime maus-tratus ba kónjuje no maus-tratus ba menór ho Nú. Prosesu 0015/21.LASIC.
“JSMP apresia pasu no progresu pozitivu sira iha tribunál tanba promove komunikasaun di’ak ho intervienente sira bainhira tribunál iha impedimentu atu realiza julgamentu tuir agenda ne’ebé marka ona.” Dehan Diretora Ezekutiva JSMP, Ana Paula Marçal
Nia hatutan antes ne’e iha 25 Setembru 2024, kazu krime seluk hanesan arma brankas ho Nú. Prosesu: 0010/22.VQWCB, husi Postu Uatukarbau, Munisípiu Viqueque no kazu maus-tratus ba kónjuje ho Nú. Prosesu 0016/21.VQVQQ, husi Postu Viqueque, Munisípiu Viqueque no kazu arma brankas ho Nú. Prosesu: 0125/23.BCEVN, husi Postu Venilale, Munisípiu Baucau mós tribunál komunika antisipadamente ba intervienente sira, tanba iha loron hanesan juis iha julgamentu kontinuasaun ba prosesu seluk iha Tribunál Judisiál Primeira instánsia Dili.
“JSMP konsidera aproximasaun ne’e nu’udar avansu ida tanba Tribunál Baucau hahú esplora vantajen meiu komunikasaun sira hodi introdús no institusionaliza nu’udar instrumentu komunikasaun ne’ebé efetivu liu, lalais no apropriadu no hamenus kustu operasionál iha era dijital hanesan ohin loron.” Dehan Diretora Ezekutiva JSMP
Nia afirma preokupasaun durante ne’e JSMP rejista dalabarak tribunál depende liubá komunikasaun formál liuhusi notifikasaun formál sei rezulta la to’o ba intervienente sira. Tanba iha kazu barak tribunál falla atu komunika antisipadamente ba intervienente kona-ba adiamentu ba julgamentu tanba impedimentu hanesan, sira tenke lakon tempu no rekursu finanseriu hodi kumpri orden tribunál hodi tuir julgamentu maibé iha ikus rona de’it tribunál adia julgamentu ba sira ninia kazu.
“Ida ne’e, halo interveniente sira sente triste no frustradu tanba tenke lakon tempu no rekursu saugate de’it. Liuliu intervienente sira ne’ebé hela iha fatin dook ka hela iha área ne’ebé jeográfikamente izoladu, dalan/estrada sira aat no viajen bele han tempu barak liu, povu kbiit la’ek no laiha transporte rasik, nune’e sira tenke aluga transporte, hanesan ojek ka karreta hodi hein sira iha tribunál.” Nia ahktuir
Nia relata iha kazu rua ne’e, JSMP observa katak loron ida antes julgamentu, tribunál liuhusi ofisiál justisa sira informa kedas ba parte intervienente sira kona-ba adiamentu tanba juis titulár iha impedimentu tanba razaun saúde no tuir informasaun ne’ebé JSMP hetan husi fonte balun katak antes juisa fila ba uma, juisa hasai kedas despaixu hodi re-ajenda fali leitura desizaun ba kazu rua ne’e ba iha 26 Juñu 2025, iha oras tuku 14:00 lokraik.
“Mezmu nune’e, JSMP mós rejista katak iha kazu balun adiamentu sira dalaruma akontese ho razaun oioin, balun hadia tanba intervienente sira la kumpre notifikasaun, balun autór judisiáriu sira mak la mai no balun tanba agenda julgamentu iha konflitu ka xoke-malu ka razaun téknika sira seluk.” Nia subliñu
Nia relata iha kazu sira hanesan ne’e, importante duni ba tribunál atu buka dalan hodi explora meiu hirak ne’e atu bainhira iha adiamentu ka impedimentu sira hanesan ne’e presiza informa antes ba intervienente sira.
Esplika liután JSMP fiar katak iha éra teknolojia ne’e fasilidade sira apropriadu, adekuadu no avansadu tebes, tanba ne’e rekomenda ba tribunál atu utiliza fasilidade sira ho efikasia no efisiente, nune’e asegura funsionamentu tribunál nian la’o ho di’ak iha futuru.
Reportajen : Nelfiano
Foto : Media JSMP