Dili, 02 Jullu 2025 (Média Democracia) – Ministeriu Joventude Desportu Arte no Kultura MJDAK Nelyo Isaac Sarmento deklara preparasaun ba jogu CPLP ba tinan 2025 nian iha Timor-Leste atinji ona ba faze final ka preparasaun masimu.
Nia dehan haree ba iha preparasaun hotu durante ne’e servisu hotu lao ho diak iha kooperasaun ida ne’ebé di’ak tebes ho parseiru sira no preparasaun hirak ne’e tama ona ba iha faze final nian.
“Servisu preparasaun ba jogu CPLP ne’ebé sei realiza iha Timor-Leste ne’e tama ona ba servisu faze final nian no agora ita hein de’it halo konfirmasaun ho paises delegasaun sira ne’ebé atu mai iha ita-nia rai no ita hein deit sira nia orariu arankamentu ka sai husi sira nian nasaun mai ita nian nasaun, tanba delegasaun no atleta, ofisiais sira nia naran tama hotu ona no agora ita hein de’it sira atu iha bilete aviaun, no balun iha ona hodi sira atu mai no balun maka seidauk sosa bilete aviaun, entaun ita nafatin halo konfirmasaun ho sira ne’ebé seidauk sosa bilete.” Dehan Ministru Joventude Desportu Arte no Kultura MJDAK Nelyo Isaac Sarmento
Nia informa, haree ba iha dokumentu hanesan naran no pasaporte kada pessoa ne’e fó hotu ona mai, maibé iha balun mós seidauk entrega mai ami, maibé MJDAK nafatin halo konfirmasaun ho sira hodi bele rekolla hotu, nune’e bele hatene katak nasaun ida ne’e mai ho ninian ema ho metade hanesan, ezemplu hanesan nasaun Guiné-Bissau sira nia dokumentu hatama hotu ona no sira mós prepara ona atu aranka mai Timor, no sira maka nasaun primeiru ne’ebé sei to’o sedu iha Timor iha loron 14 fulan jullu no nasaun seluk sira mós sei mai maibé MJDAK nafatin halo konfirmasaun ho delegasaun sira.
“Haree ba iha preparasaun internal ninian hanesan hotel no transporte nomos orariu jogu ne’e ita prepara hotu ona ita bele dehan ne’e los hotu ona no hein sira mai de’it, hodi ita kontinua ba ajenda jogu ninian, karik sira to’o hotu ita hala’o abertura no nasaun ida ne’ebé atu joga bele hahu joga ona no iha loron 08 fulan jullu ekipa tekniku jogu CPLP nian sira to’o ona iha Timor mai sei servisu hamutuk ho komisaun organizadora sira hodi prepara no haree di’ak liután fatin nomos ekipamentu sira ba jogu.” Hatutan Ministru Joventude Desportu Arte no Kultura MJDAK
Nia afirma, MJDAK sei koalia mós ho organizasaun sira haree ba iha programas kulturais hanesan dansa kultural sira, hahan, musika ne’ebé sei uza iha jogu CPLP nomos haree ba iha servisu logistiku nian.
“Atleta Timoroan ne’ebé rejistu ona ba jogu ne’e hamutuk atus-ida, no agora loron hala’o hela treinamentu no haree mós ba sira-nia kondisaun saude, nune’e sira bele partisipa iha jogu refere, maibé atu dehan de’it katak governu garantia hela sira nia kondisaun saude hodi partisipa iha eventu refere.” Afirma Nelyo Isaac Sarmento
Nia reafirma haree ba iha servisu hirak ne’ebé durante ne’e hala’o, MJDAK bele dehan atinji ona ba 87% ba iha preparasaun ba logistiku, preparasaun ba iha konformasaun dokumentu, preparasaun mós ba iha programasaun sira ne’ebé sei anima iha eventu jogu CPLP, esperansa katak servisu hirak ne’e sei finaliza iha semana tuir mai no eventu ne’e sei susesu tuir ajenda ne’ebé prepara ona.
Reportajen : Domingas
Foto : Media Officer MJDAK