Dili 02 Jullu 2025 (Média Democracia) – Sekretaria Estadu Igualdade (SEI) liuhusi Diresaun Nasionál Dezenvolvimentu Igualdade Jéneru-(DNDIJ) selebra akordu ho Asosiasaun Feto Munisípiu (AFM) no Organizasaun Naun Govermentál (ONG) Nasionál sira ne’ebé servisu iha área Kapasitasaun Feto no Prevensaun Violénsia Bazeia ba Jéneru, atividade hala’o iha Salaun Maria Goreti, SEI Caicoli, Tersa semana ne’e
Sekretária Estadu ba Igualdade, Elvina Sousa Carvalho hatete atividade ohin loron nia SEI sei asina akordu ho Prezidente no Vise-Prezidente Asosiasaun Feto Munisípiu 12 no RAEOA no ONG Nasionál hamutuk 13 ne’ebé nia servisu foku ba iha área hasa’e kapasitasaun feto no ONG balun ne’ebé lidera husi Ema ho Defisiénsia no Komunidade LGBTQI+ sira
“Asina akordu kona-ba apoiu fundus ne’ebé SEI oferese ba Asosiasaun Feto Munisípiu no ONG uza Fundus Transferénsia Públiku (FTP) hodi haforsa kapasidade lideransa feto Munisípiu too Suku inklui feto iha partidu polítiku liuhusi formasaun, desiminasaun informasaun, sosializasaun ba Lei Poder Lokál, programa empoderamentu ekonómiku no formasaun iha área lideransa koalia iha públiku ba lideransa feto sira hodi prepara ba iha eleisaun Kamára Munisipál. Fundu sei apoiu organizasaun sosiedade sivíl balun nia área foku servisu ba iha prevensaun violénsia bazeia ba jéneru.” Dehan Sekretária Estadu Igualidade, Elvina Sousa de Carvalho
Sekretária hatutan iha abertura hato’o apresiasaun ba asosiasaun feto Munisípiu sira no Diretora husi ONG sira ba iha sira-nia lideransa no sira-nia papél prinsipál ne’ebé SEI konsidera importante tebes nune’e bele hala’o servisu iha Munisípiu no liu-liu iha área rural
“SEI sai parseiru prinsipál ba imi nune’e bele hakbi’it feto iha vida polítika, ekonomia no prevensaun Violénsia Bazeia ba Jéneru, fó asisténsia ba maluk sira ne’ebé vulnerável hasoru problema sente izoladu no mesak de’it la hetan informasaun ruma. Ita-boot sira-nia servisu atu fó asisténsia no hakbiit sira iha tempu ne’ebé defisil nune’e sira bele asesu informasaun ruma.” Dehan nia
Sekretária afirma apoiu ne’e ho orsamentu ne’ebé ki’ik maibé durante ema hotu-hotu halo servisu ho di’ak, fiar katak AFM no ONG sira sei jere no utiliza fundus refere ho efetivu no sei benefísia alvu husi programa ne’ebé sei implementa iha Munisípiu 12 inklui RAEOA
Iha fatin hanesan Diretór Nasionál Dezenvolvimentu Igualdade Jéneru (DNDIJ), José do Rosário de Carvalho hatete, SEI sai hanesan mákina Estadu ne’ebé responsável ba iha asuntu igualdade jéneru no inkluzaun nafatin iha komitmentu oinsá atu servisu hamutuk ho entidades hotu nasionál no Munisipál iha hakbi’it feto iha lideransa no prenvensaun Violénsia Bazeia ba Jéneru.
“SEI apoiu fundu ba Asosiasaun Feto Munisípiu 12 no RAEOA hamutuk $52.000,00,- ne’ebé kada AFM hetan $4.000,00, orsamentu ne’ebé aloka ba ONG hamutuk 8 ho totál $54,000.00, ONG nasionál hanesan, Feto Prontu Lidera $15,000.00, Alfela $8,000.00, Fokupers $8,000.00, Fundasaun Alola $8,000.00, Juventude Hamutuk ba Futuru Saúde Timor-Leste (JLHFS-TL) $2,000.00, Klibur Defisiénsia Tilun Timor-Leste (KDT-TL) $3,000.00, Asosiasaun Dezenvolvimentu ba Futuru Labarik (ADFL) $3,000.00, Asosiasaun Halibur Defisiénsia Matan Timor-Leste (AHDMTL) $3,000.00 no CODIVA $4,000.00.” Dehan DNDIJ
Diretór hatutan hafoin kongresu asosiasaun feto Munisípiu iha tinan kotuk, responsabilidade ida ne’ebé SEI atribui ba iha Asosiasaun Feto Munisípiu mak oinsá hametin koordenasaun servisu hodi empodera feto iha munisípiu sira iha área lideransa hodi prepara feto ba desentralizasaun no poder lokál
Esplika liután Sekretária Estadu Igualdade-SEI realiza atividade hodi selebra akordu hamutuk ho Asosiasaun Feto sira mai husi Munisípiu 12 inklui Rejiaun Administrativu Espesial Oe-cusse Ambeno RAEOA no ONG Nasionál hotu hodi haree ba servisu iha área empoderamentu feto no prevensaun Violénsia Bazeia ba Jéneru iha rai laran
Reportajen : Nelfiano
Foto : Nelfiano