Dili, 03 Jullu 2025 (Média Democracia) – Federasaun Kooperativa Kreditu Hanai Malu (FCCHM) realiza formasaun ba membru sira husi Munisípiu 12 inklui Rejiaun Administrativu Espesial Oe-cusse Ambeno RAEOA, ho tema Fortalesimentu Instituisional hodi Asegura Substentabilidade Kooperativa nian iha rai laran. Atividade ne’e hala’o iha salaun FCCHM Bairo-pite Dili.
Diretor Konfederasaun Nasional Kooperativa Timor-Leste, Elizario Ferreira hateten, relasiona ho atividade dahuluk formasaun ne’e ho “tema fortalesimentu institusional ho nia objetivu prinsipal mak asegura substanbilidade institusional kooperativa nian iha rai laran.
“Haree ba estabelidade finanseira kooperativa nia hodi asegura kapital finanseira ba membru sira estabelidade ekonomia ba membru sira hotu. Objetivu da-ruak nia maka komemorasaun loron internasional kooperativa nia, ne’ebé sei realiza iha dia 05 fulan Jullu tinan ida ne’e.” Dehan Diretor FCCHM, Elizario Ferreira
Nia hatutan tuir kalendariu internasional katak, kada tinan iha fulan Jullu mundu tomak selebra loron internasional kooperativa nian, iha tinan ida ne’e la’os loron nasional, maibé loron internasional kooperativa no tema kooperativa konstroi mundu ida ne’ebé di’ak liu.
“Liga ho tema ida ne’e mai deklara iha tinan 2012 husi Sekretáriu Jeral Estadu Unidas ONU Ban Ki-moon, iha fulan Jullu tinan 2024 Sekretáriu Jeral Estadu Unidus ONU Antonio Guterres deklara hikas iha tinan 2025 nu’udar tinan internasional kooperativa.” Haktuir Diretor FCCHM
Nia haktuir da-toluk nian kona-ba asembleia jeral iha loron 05 fulan Jullu husi Federasaun Kooperativa Kreditu Hanai Malu sei realiza asembleia jeral ba tinan 2024 nia hodi avaliasaun progresu no desafiu durante ne’e infrenta.
Iha fatin hanesan Prezidente FCCHM, Flavio Maria Guterres informa, tuir estatutu FCCHM nia tinan ida halo reuniaun dala rua atu bele apresenta relatoriu anu-fiskal iha anterior, iha fulan Dezembru halo reuniaun planeamentu nasional.
“Ohin reuniaun ne’e atu apresenta relatoriu anual no asembleia jeral kooperativa hodi hare’e kona-ba relatoriu, ami halo uluk formasaun ho objetivu atu membru sira mai husi primeriu kooperativa sira.” Dehan Prezidente FCCHM Flavio Maria Guterres,
Nia hatutan, nune’e bele fahe informasaun ba malu hodi adekua ideia balun no fasilita formador mai husi Asian Confederation Credit Union (ACCU) atu mai fahe formasaun mai membru FCCHM husi Munisipiu 12 inklui RAEOA.
“Iha tinan 2015 FCCHM servisu hamutuk ho ACCU halo programa bo’ot ida naran estandarizasaun ba Kreditu Uniaun (CU) sira hodi indetifika primeriu kooperativa hamutuk 20 mak tama iha programa estandarizasaun.” Informa Prezidente FCCHM
Nia hatutan Federasaun Kooperativa Kreditu Hanai Malu ho orsamentu montante 22 milloens iha kooperativa ho montante $18 milloens mak serkula iha baze. Iha fulan Jullu tinan 2025, serkula ona kapital empretimu husi membru hamutuk rihun 19 ho orsamentu serkula ba sira ho montante $13 milloens.
Esplika liután ezistensia Kooperativa iha Timor-Leste hodi bele fó solusaun finanseira no ekonomia uniku ba povu tomak. Fiderasaun Kooperativa Kreditu Hanai Malu nia primeriu membru hamutuk 73, maibé ativu lo’os ne’e 47 no rejistu hamutuk 32.192 pesoa no kompostu mane 47% no feto 53% signifik feto barak liu mane.
Reportajen : Nelfiano
Foto : Nelfiano