Dili, 03 Jullu (Média Democracia) – Sekretariu Estadu Kooperativa realiza reuniaun konsellu koordenasaun ho reprezentante membru movimentu kooperativa sira husi Munisipiu sanulu resin-rua inklui Raeoa. Reuniaun ne’e hala’o iha Salaun Katedral Dili
Iha entrevista ho Secoop Arsenio Pereira da Silva hateten, objetivu husi enkontru ida ne’e ba dala rua ho liña koordenasaun sira hotu husi Munisipiu sira atu halo harmonizasaun ka diskute kona-ba ba lei sira ne’ebé vigor iha rai ida ne’e atu nune’e setor hotu ne’ebé hala’o nia atividade ekonomiku iha Munisipiu sira inklui Raeoa atu bele lao ho di’ak tuir lei ne’ebé iha ona no vigor iha ekonomia iha rai laran.
“Dala barak movimentu kooperativa primeriu sira atu mai rejistu sempre hasoru problema balun liuliu rekezitus sira ne’ebé iha ona, tanba ida ne’e oportunidade ida ohin ita atu tur hamutuk ho membru movimentu kooperativa sira husi Munisipiu 12 inklui Raeoa atu diskute no fó hanoin saida maka ita bele halo no governu presiza halo saida liuliu Secoop haree ba obstaklu ne’ebé ita nia membru kooperativa primeriu hasoru, tanba ne’e husu ba setor kooperativa hala’o ninian funsaun ho lolos hodi fasilita ba kooperativa primeriu sira ba prosesu registu ninian.” Dehan Secoop Arsenio Pereira da Silva
Nia hatutan, agora daudaun iha Timor eziste ona kooperativa primeriu sira hamutuk atus-rua haatnulu resin-lima kompostu husi Munisipiu sira hotu, tanba ne’e maka husi enkontru ida ohin Secoop atu rona ideia kada reprezentante kooperativa sira husi Munisipiu sanulu resin-rua inklui Raeoa atu fó sira nia hanoin ba obstaklu ne’ebé daudaun kooperativa primeriu sira hasoru hela relasiona ho rejistu nian.
“Hanesan ohin ha’u dehan ona enkontru ida ne’e kontinua ka enkontru ba dalarua nian, tanba ezizensia husi kooperativa primeriu sira atu ba halo rejistrasaun iha notariadu atu bele hetan legalidade ba kooperativa primeriu sira ne’e, no sira bele hetan numeru Tik nian, maibé sira hetan obstaklu ruma maka iha Lei balun ne’ebé la iha harmoniazasaun, entaun ida ne’e maka difikulta kooperativa primeriu sira atu bele ba halo rejistrasaun, entaun enkontru ida ne’e nia objetivu prinsipal maka atu Secoop ho membru kooperativa sira bele diskute no tau hanoin hamutuk atu bele fasilita membru kooperativa primeriu sira bele ba rejistu iha notariadu.” Hatutan Arsenio Pereira da Silva
Nia informa, ho obstaklu ne’e maka ohin Secoop hala’o tan enkontru hodi fasilita hasoru malu diskuti, no iha mós orador sira husi liña Minesterial sira ne’ebé relevante, atu mai fahe informasaun hodi fasilita membru kooperativa primeriu sira tuir prosesu no rekejitus ba rejistrasaun iha notariadu.
Esplika kle’an liután reuniaun ne’e partisipa husi Sekretariu Estadu Kooperativa ho nia estrutura no funsionariu sira, inklui membru kooperativa reprezentante husi munisipiu Ermera, Manufahi, Liquisa, Manatutu, Lautem, Ainaro, Aileu, Baucau, Viqueque, Covalima, Atauru inklui reprezentante membru kooperativa Raeoa, nomos orador sira reprezentante husi membru kooperativa.
Reportajen : Domingas
Foto : Domingas