Dili, 04 Jullu 2025 (Média Democracia) – Sekretariu Estadu Kooperativa (SEKoop) realiza enkontru koordenasaun ho parseiru dezenvolvimentu kooperativa nian ne’ebé durante ne’e apoiu Governu hodi halo atividade servisu kooperativa nian iha rai laran. Atividade enkontru ne’e hala’o iha Beach Garden Pante-Kelapa, Kuarta semana ne’e.
Sekretáriu Estadu Kooperativa, Arsénio Pereira hateten, ohin realiza atividade enkontru ida ne’e marka oportunidade signifikativa ida ba SEKoop, atu reflete ba viajen koletiva hanesan progresu servisu iha kooperativa nian. Aleinde ne’e konstituisaun rekoñese kooperativa sira nu’udar komponente xave, hamutuk ho setór públiku no privadu harii ekonomia ida ne’ebé forte no inkluzivu.
“Movimentu kooperativa nian laos buat foun iha Timor-Leste, maibé presiza renovadu, enerjia, forte liubá parseria investimentu. Ita labele halo mesak, servisu hamutuk ho ajénsia no instituisaun oioin, maibé ami mós rekoñese katak presiza halo buat barak liután.” Dehan Sekretáriu Estadu Kooperativa (SEKoop), Arsénio Pereira
Nia hatutan kooperativa nia papél krusiál ida hodi hadi’a meiu subsisténsia sira iha komunidade rurál, liuhusi hakbiit juventude hodi fornese asesu ba finansa no merkadu ba agrikultór ki’ik iha rai laran.
“Ami fiar dezenvolvimentu setór kooperativa laos haree de’it ba prioridade ekonómiku nian maibé ida ne’e ferramenta atu ajuda no apoiu ita atu atinje objetivu sira dezenvolvimentu substentavel nian, globalmente no kontribui signifikativamente ba ita-nia nasaun.” Hatutan Sekretáriu SEKoop
Nia informa, liuhusi sorumutu ne’e atu identifika dezafiu no oportunidade sira no hametin espíritu kooperasaun kooperativa no haree susesu saida mak durante ne’e parseiru sira halo no dezafiu saida mak sira enftrenta hodi tau hamutuk planu ba futuru nian.
“Servisu ho parseiru dezenvolvimentu sira durante ne’e iha progresu tanba ho sira nia apoiu tomak iha terrenu halo kooperativa barak ne’ebé mate no laiha susesu daudaun ne’e moris fali ona halo atividade hanesan baibain.” Informa Arsénio Pereira
SEKoop iha misaun atu foku ba setór kooperativu, tanba área ne’e iha papél krítiku ba dezenvolvimentu país hanesan deskreve iha Konstituisaun RDTL iha artigu 138 kona-ba setór kooperativa hanesan sosiuekonómiku ba dezenvolvimentu sustentavel.
Esplika liután progresu antes ne’e eziste grupu kooprerativa 100-resin, maibé agora sa’e ba 245, tanba hetan apoiu husi parseiru dezenvolvimentu sira. Ema ne’ebé envolve iha kooperativa besik rihun 39 no akumula ona kapitál hamutuk millaun $20,4. Aleinde sorumutu ne’e partisipa maximu husi parseiru dezenvolvimentu hanesan Care Internasionál no Kooperasaun Finanseira Internasionál no seluk tan.
Reportajen : Nelfiano
Foto : Nelfiano