Dili, 07 Jullu 2025 (Média Democracia) – Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku, Francisco Kalbuadi, hateten, Banco do nosso futuro veteranu modellu dezenvolvimentu sentradu ba iha povu.
Iha entervitsa Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku, Francisco Kalbuadi hateten, Banku ida-ne’e sai hanesan ajente ekonómiku xave ida no kataliza la’ós de’it empreza individuál, maibé kreximentu koletivu nasionál.
“Liuhusi banku ida ne’e, ita implementa ona modellu dezenvolvimentu ida neʼebé sentradu iha povu, iha ne’eba ekonómia buras la’ós de’it iha leten, maibé husi baze ba leten, husi Suku ba Suku, husi Aldeia ba Munisípiu. Veteranu, agrikultór, peskadóre, feto emprezária, no joven inovadór sira sei iha asesu ba ferramenta sira hodi harii sira-nia negósiu, sira-nia kooperativa no sira nia mehi.” Vise-Primeiru Ministru ba Asuntu Ekonómia Francisco Kalbualdi, dehan iha lansamentu fatuk dahuluk banku veteranu
Liuhusi banku ida ne’e harii la’ós de’it instituisaun ida, maibé legadu ba oportunidade ida. Banku do Nosso Futuro sei oferese finansiamentu ne’ebé adapta ba kontestu, kréditu neʼebé kompriende realidade Timoroan nian, no programa poupansa ne’ebé promove reziliénsia ekonómika iha nível uma-kain.
Governante ne’e rekoñese fundu veteranu ne’e sei kontribui nafatin ba jerasaun sira iha futuru. mai ita mós rekoñese Fundu Investimentu Veteranus no Konsellu Libertasaun Nasionál neʼebé nia vizaun no lideransa nakfilak ideia ida ba asaun. Nune’e sira nia kontribuisaun sei kontinua nafatin iha nasaun ne’e husi jerasaun sira presente no sira ne’ebe sei tuir mai.
Futuru neʼebé harii ohin tenke inkluzivu, sustentável, no dignu. Iha Banku do Nosso Futuro, ita sei kuda fini sira ba futuru ne’ebá-ho abut iha sakrifisiu no sanak sira to’o ba prosperidade ne’ebé sei fahe, no instituisaun ida-ne’e sai faru ba justisa finanseira, inkluzaun ekonómika, no dezenvolvimentu nasionál, símbolu loloos ne’ebé eziste iha Timor-Leste.
“Ita fó onra ba ita-nia pasadu hodi harii nia futuru. Mai ita hamutuk tau fatuk inan ida-ne’e hanesan simbolu ida katak Veternus mós prontu atu kontribui ba ita-nia rai liuhusi dezenvolvimentu ekonomiku, nune’e ita hamutuk bele kontribui no servi diak liután ba povu rai doben Timor-Leste.” Hatutan Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku Francisco Kalbualdi
Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku subliña tan katak, Banku do Nosso Futuro la’ós de’it instituisaun finanseira, ida-ne’e símbolu ba esperansa, kontinuidade no gratidaun nian. Harii ho apoiu husi Fundu Investimentu ba Veteranus no husi lideransa Konsellu Libertasaun Nasionál sira, banku ida-ne’e lori mensajen kle’an ida iha misaun atu fó onra ba sira neʼebé lori ita mai liberdade, la’ós de’it iha memória, maibé hodi fó kbiit ba sira-nia futuru, sira-nia família no komunidade sira-nia futuru.
“Naran Banku do Nosso Futuro reflete vizaun nasionál ida, ne’ebé ita-nia veteranu sira la’ós ona haree de’it nu’udar erói ita-nia pasadu nian, maibė nu’udar ajente ekonómiku ba ita-nia dezenvolvimentu ohin loron nian, no promotór ba ita-nia prosperidade nasionál aban-bainrua.” Subliña Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku
Nia inform tan, banku ida-ne’e sei sai hanesan ponte finanseiru ida ne’ebé liga patriotizmu ho produtividade, no sakrifisiu ho sustentabilidade. Ida-ne’e sei fornese kréditu, servisus bankárius, no oportunidade ba investimentu ne’ebé partikularmente ho objetivu atu hametin ekonomia komunidade lokál sira, liuliu iha área rurál sira ne’ebé asesu finanseiru istórikamente limitadu.
“Harii Banku do Nosso Futuro ne’e aliña tebes ho Politika Dezenvolvimentu IX Governu Konstitusionál nian, neʼebé fó prioridade ba diversifikasaun ekonómika aleinde mina no gás, hametin partisipasaun setór privadu sira nian, hakbiit ekonómia rural sira, no asesu finanseiru inkluzivu ba segmentu hotu-hotu iha sosiedade.” Informa Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku, Francisco Kalbuadi
Nia reafirma liután, ho ida-ne’e sente orgullu no onra boot hodi hamrik hamutuk ho veteranu sira hotu marka jornada istórika ida tau fatuk dahuluk ba eskritóriu Banku do Nosso Futuro. Serimónia ida-ne’e laos inisiu ba estrutura fizika ida nian deit, maibé ida-ne’e nu’udar tau fatuk-inan ida ba nasaun nia reziliénsia ekonómika, ba dezenvolvimentu inkluzivu, no aspirasaun koletiva sira nu’udar povu.
Reportajen : Domingas
Foto : Media Officer Vise-Primeiru Ministru ba Asuntu Ekonómia no Ministru Turizmu no Ambiente, Ministru Koordenadór Asuntu Ekonómiku