ili, 30 Abril 2026 Media Democracia- Sentru Saúde Comoro fornese Imunizasaun iha Eskola Maria Auxiliadora ba klase 1°ano no 6°ano nain, atus ida ne’en nulu resin haat (64) hodi hetan protesaun maximu ba sira nia moris iha futuru
Tuir Anjelina da Costa Rangel Bareto hanesan Medica Oficial iha Programa Imunizasaun, Departamentu Imunizasaun, Ministeriu Saúde (MS), hateten, objetivu ohin loron itu selebra loron mundial saúde nian mak , Semana Imunizasaun Mundial nian.
“Semana ida ne’e ita foka liu ba iha atividade Imunizasaun, husi atividade ida ne’e sai mós hanesan atividade prioridade ida ba iha programa imunizasaun nian, tanba ita hotu hatene imunizasaun ne’e importante tebes, ami mai iha eskola ida ne’e maibé la’os eskola ida ne’e de’it, ba eskola hotu-hotu iha Classe 1° no ba Klase 6° ita fornese imunizasaun ne’e ba sira nune’e sira mós bele hetan protesaun masimu durante sira nia moris tomak,. Vasina ida ne’ebé mak sira simu ne’e hanesan kontinuasaun tanba ne’e atu kompleta liu tan sira nia imunidade, iha tinan ida labarik ida simu dala ida de’it, ba labarik klase 1° ano hetan vasina refere atu bele kontra moras, Difteri ho Tetanus, nia objetivu atu fó protesaun masimu ba sira kontra moras refere, husi bebe to’o tinan ne’en (6).” Dehan Angelina da Costa Rangel Bareto
Nia hatutan iha classe 6° foka liu labarik feto de’it maibé la haree ba idade, vasina ida ne’e hodi kontra moras Kankru iha futuru, tanba feto sira mak iha oan fatin entaun ita fo ba sira hodi prevene moras hirak ne’e iha futuru, laos iha eskola de’it maibé iha komunidade mos ita fornese ba labarik feto sira.
“tanba ita haree ita nia kontestu ita nia insedensia katak moras ida ne’e mós hamate ema bara no globalmente iha mós nasaun Timor-Leste. Entaun hakarak prevene ba sira la’os agora de’it, maibé iha futuru, tanba ne’e mak ita fó ba labarik 6° ano sira hodi prepara liu tan sira nia aan. Bainhira tama idade reprodutiva entaun sira mos iha ona imunidade ne’ebé masimu kontra moras refere atividade ne’e rutinamente, la’o hela iha Timor laran tomak. Iha eskola hotu iha mós fasilidade Postu vasinasaun hotu, imunizasaun iha eskola ida ne’e sai mos ezemplu ba eskola sira seluk iha Tmor-Leste importansia husi imunizasaun ne’ebé mak ita fó ba labarik sira husi primeiru no sestu anu no mos komprensaun inan aman sira oinsa estudante sira tenke simu vasina.” Nia dehan
Parte seluk tuir Paul Alves Cabral, reprezentante hanesan aman husi oan sira ne’ebé eskola iha ne’e hateten atividades husi Ministériu Saúde nian, programa ida ne’e efetivu kedas ba ita nia oan sira nia saúde ba futuru
“Hanesan ohin enfermeira sira esplika katak hodi prevene moras husi futuru nian ida ne’e hanesan inan aman, ami sempre supurta,uluk sei ki’ik vasina iha sentru saúde, mais iha eskola foin mak vasina sei nia kontinuasaun, husi durante sira ba vasina iha sentru saúde tanba husi formasaun ohin ita nia pesoal saúde sira espika klaru tebes moras ida ne’e detekta kuandu ita la halo imunizasaun ida ne’e fiar katak ita hetan vasina ne’e hodi sai seguru liu tan ba labarik sira nia saúde “. Dehan Paul Alves
Nia salienta hanoin Ministériu hala’o sira nia programa ne’e ba iha sidadaun sira nia saúde laiha problema kuandu ida ne’e ba oan sira nia saúde sira nia di’ak ba oin hanoin ne’e laiha problema ida.
Reportajen : Estajiada Juliana/ Leozalia
Foto : Leozalia