Dili, 08 Jullu 2025 (Média Democracia) – Iha Timor-Leste, situasaun sosiál-ekonómiku la’o ho dezafiu barak. Ema barak hela iha kondisaun moris ne’ebé seidauk dignu, inklui família balun ne’ebé hela iha uma baraka, tanba seidauk asesu ba uma permanente, be’e, aliméntu, elektrisidade, edukasaun no seluk tan.
Prezidente Repúblika José Ramos-Horta kontinua halo efikasia Sosiál oin-oin hodi defende direitu báziku ba ema hotu, espesiálmente ba família sira ne’ebé ho kbi’it naton. Nia kontinua hatudu preokupasaun bo’ot ba família kbi’it natón ne’ebé hela iha uma baraka, seidauk hetan naroman husi eletrisidade, alimentu nst.
“Gabinete Serbisu Sosiedade Sivil no Assuntu Sosiál, foin lalais haree direta kondisaun moris família ida iha Tasi-Tolu (Danau-1) Dilin ne’ebé durante tinan ida ona família refere hela iha uma baraka ki’ik ho oan nain-5 kompostu husi oan feto nai-4 no mane 1, sira hotu sei otas ki’ik.” Dehan Prezidente Repúblika José Ramos-Horta
Nia hatutan oan-feto primeiru naran bolu ‘Paya’ ho tinan-10 no oan-feto segundu naran bolu ‘Moko’ ho tinan-7, sira na’i rua lakon direitu atu asesu ba edukasaun hanesan mós nia maluk sira seluk, maibé sira tenke para estudu iha eskola primária ho razaun família kbi’it lato’o. Oan nai-3 sira seluk sei otas ki’ik, oan mane ida hela ho nia inan-aman no oan feto nai2 hela ho nia avo sira iha foho. Maski hela iha situasaun ne’ebé la dignu, família ne’e hakmatek ho esperansa no kontinua buka moris ba oan sira.
Iha fatin hanesan, Robino Florival do R. Madeira, nu’udar aman ida iha responsavel bo’ot, kontinua esforsu maka’as no buka meus oin-oin hodi bele sustenta família ne’e nia preokupasaun, dalan ida mak serbisu nu’udar Lixeiru iha Tibar.
“Ha’u hodi tetu sasan sira ne’e mak hetan osan hodi sosa fos no modo ba labarik sira han, semana ida paling hetan mak $5-$10, sasan balun haree ba di’ak ne’e lori mai uma hodi uza fali, hanesan lona balun ne’ebé didin ba uma ne’e.” Hateten Robino Florival
Nia hatutan loron-loron, nia tenke koleta lixu (Besi a’at, masa, kalén, lata nst.) ida ne’e ba nia hanesan koleta esperansa ida ba nia família, tan husi ne’e mak nia hetan osan hodi sosa fós, modo ruma ba nia-oan no família.
Iha sorin seluk Koordenadora Jerál Gabinete Serbisu Sosiedade Sivil no Assuntu Sosiál, Teresa dos Santos Ximenes hateten, enkoraja família ne’e, hodi Prezidente Ramos-Horta nia naran, sei tulun nafatin família ne’e no lori sustenta oan sira bele asesu ba edukasaun.
“Ita-nia Prezidente, saida mak nia haree no sente mak nia haruka hela ami mai, lori ita-nia prezidente nia naran apoiu netik. Nesesidade oituan, pois ajuda tan ama-apa nia oan feto nai-2 ba hela iha madre sira hodi bele ba eskola, ne’e para hamenus todan ne’ebé durante ne’e família sente.” Dehan Teresa dos Santos Ximenes.
Nia afirma agradese ba ekipa prezidénsia liu-liu ba Prezidente Repúblika Ramos-Horta ne’ebé ho inisiativa rasik bele orienta ona ekipa mai vizita iha fatin ne’e no fó ona tulun nesesidade ruma no apoiu ba oan sira nia eskola.
Esplika liután prekupasaun balun husi sira mak, husu nafatin ba Prezidente Repúblika bele hato’o netik ba governu relevante atu dada ahi-eletrisidade no sosa profil Bee- Moos nian, nune’e sira labele konsumu bee ho di’ak no labele lao ain dook hodi ba kuru bee-moos bele fasilita ba nesesidade.
Reportajen : Nelfiano
Foto : Domingas