Dili, 09 Jullu 2025 (Média Democracia) – Ministeriu Asuntu Kombatentes Libertasaun Nasional hamutuk ho CCLN Munisipal hala’o reuniaun hodi entrega simbolikamente dadus reklamasaun no kontestasaun primeiru rejistu veteranu 2003-2005 no segundu rejistu 2009 husi MAKLN ba CCLN Munisipal, Atividades entrega dadus ne’e hala’o iha tersa feira semana ne’e.
Ministru Asuntu Kombantentes Libertasaun Nasional Gil da Costa Monteiro “Oan Soru” hateten, ohin atu informa bá públiku kona-ba dadus sira ne’ebé atu públika sai iha Janeiru 2025.
“Ohin ami simu reklamasaun no kontestasaun hamutuk 61.704. Reklamasaun Rihun 58.584 ba Munisipiu hotu-hotu inklui RAEOA. Kontestasaun hamutuk 3.120 ne’e signifika ema 61 ne’e halo protestu hasoru kombatente sira hamutuk 53.272. Totál ne’ebé ha’u temi ne’e tékniku hatama hotu tiha ona depois ami sei entrega fila-fali dokumentu tuir munisípiu ida-idak nian. Artigu 35 tuir kombatente nasionál no dekretu lei númeru 7, estatutu orgániku CCLN nian, aliña sesto, pontu H. Ami sei entrega fila-fali hodi sira ba halo fali sira-nia reuniaun bainhira mak hala’o fali servisu ba kontestasaun no reklamasaun.” Dehan Ministru Asuntu Kombantentes Libertasaun Nasional Gil da Costa Monteiro “Oan Soru”
Nia hatutan, Totál reklamasaun no kontestasaun hamutuk 61.711. Reklamasaun ida ne’e reklamante sira halo hodi kontra ka hasoru Kombatentes 53.272. Tuir mai dadus reklamasaun no kontestasaun fahe kada Munisipiu. Munisipiu Aileu, ema nain 3.179 halo reklamasaun ka kontestasaun hasoru kombatente nain 2.822. Munisipiu Ainaro, ema nain 5.666 halo reklamasaun ka kontestasaun hasoru kombatente nain 4.023. Munisipiu Baucau, ema nain 9.332 halo reklamasaun ka kontestasaun hasoru kombatente nain 8.459. Munisipiu Bobonaro, ema nain 6.757 halo reklamasaun ka kontestasaun hasoru kombatente nain 5.939. Munisipiu Covalima, ema nain 5.237 halo reklamasaun ka kontestasaun hasoru kombatente nain 4.806. Munisipiu Dili, ema nain 2.825 halo reklamasaun ka kontestasaun hasoru kombatente nain 2.375. Munisipiu Ermera, ema nain 8.566 halo reklamasaun ka kontestasaun hasoru kombatente nain 7.214. Munisipiu Lautem, ema nain 2.677 halo reklamasaun ka kontestasaun hasoru kombatente nain 2.460. Munisipiu Liquiça, ema nain 1.835 halo reklamasaun ka kontestasaun hasoru kombatente nain 1.556. Munisipiu Manatuto, ema nain 3.635 halo reklamasaun ka kontestasaun hasoru ema nain 3.391. Munisipiu Manufahi, ema nain 3.419 halo reklamasaun ka kontestasaun hasoru ema nain 3.202. Viqueque, ema nain 5.449 halo reklamasaun ka kontestasaun hasoru kombatente nain 4.268. No Oecusse, ema nain 3.112 halo reklamasaun ka kontestasaun hasoru kombatente nain 2.736. Signifika katak iha dadus sira ne’ebe kombatentes sira halo ona reklamasaun ne’e maibé iha ema balun ne’ebé la aseita no mai halo protestu iha MAKLN Munisipiu, entaun husi dadus hirak ne’e sei fó fila-fali ba CCLN Munisipal.
“Dadus ne’ebé iha MAKLN no iha mós ema balun ne’ebé mai halo reklamasaun, maibé la rekoñese sira nia-aan husi Munisipiu ne’ebé, entaun MAKLN tau deit. Iha Sem Municipio, 4 (ema na’in-haat halo reklamasaun, mais la identifika aan, sira husi Munisipiu ne’ebé), sira ne’e halo reklamasaun ka kontestasaun hasoru kombatente nain tolu 3. Inklui mós Fora de Timor, signifika katak maluk Timoroan balun la aseita ho dadus veteranu ne’ebé taka ona, no sira ne’e hamutuk nain sanulu resin-ualu (18).” Informa Ministru Asuntu Kombantentes Libertasaun Nasional Gil da Costa Monteiro “Oan Soru”
Nia hatutan, husi reklamasaun no kontestasaun ne’e Konsellu Kombatente sei halo reuniaun hodi foti desizaun liuhusi konferénsia imprensa no kongresu. Tanba ne’e ida-ne’ebé hakur mota liu to’o foho tutun mak nia bele no ida-ne’ebé labele mak pasiénsia tanba MAKLN lao tuir lei ne’ebé iha ona.
“Iha balun ne’ebé lori nia dokumentu mai no naran la taka sai maibé nia nafatin reklama ita konsidera katak nia ema naun-kombatente maibé nia nafatin hatama dokumentu ne’e signifika ema ne’e lasatisfeitu, maibé atu dehan tan katak MAKLN lao tuir lei ne’ebé iha ona no dadus hirak ne’e sei lao tuir ninian prosesu.” MAKLN Gil da Costa Monteiro “Oan Soru”
Lista taka sai dehan nia la’ós kombatente depois sai iha editál nafatin dehan nia la’ós kombatente, entaun ida ne’e mak normalmente funsiona no sira mós lao tuir lei, nune’e fó hatene ba públiku, ohin entrega dokumentu fíziku ba CCLN hodi halo reuniaun no halo desizaun ruma depois mak tempu oin mai sei rona fali husi CCLN Munisipiu nomos MAKLN.
“Lista sei taka sai maibé CCLN Munisipal sira presiza halo reuniaun, tanba dadus hotu-hotu mai la’os reklamasaun de’it, iha mós ema ne’ebé lahetan reklamasaun no kontestasaun. Ema ida ne’ebé la protestu sira ne’e mak hatama rekerimentu. Ema ne’ebé halo rekerimentu hahú husi tinan 24, ema sub-asistensia, PPU hamutuk 21.696. ida-ne’e, ema ne’ebé la sofre la hetan protesta husi ema seluk kona-ba kontestasaun no reklamasaun.” Esplika Gil da Costa Monteiro “Oan Soru”
Nia reafirma lista sira ne’e sei lori ba CCLN Munisipiu ida-idak sei halo duni pagamentu maibé ne’e sei iha Dezembru, maibé la signifika sira-ne’e simu hotu, tanba naran sira-ne’e sei ba taka tan dala ida iha Munisipiu sira, bainhira taka naran mak iha tan kontestasaun hasoru kombatente signifika kombatente ne’e sei la hetan pagamentu.
Reportajen : Domingas
Foto : Domingas