Dili, 15 Jullu 2025 (Média Democracia) – Ministeriu Juventude Desportu Arte no Kultura (MJDAK), Nelyo Isaac Sarmento, konvida ema hotu atu partisipa jogu nasaun sira ko’alia lian portugés, ne’ebe sei abertura husi ekipa futeból Timor-Leste hasoru ekipa futeból Portugal, iha loron 19 fulan ne’e iha estadiu Munisipal Dili.
Ministeriu Juventude Desportu Arte no Kultura, Nelyo Isaac Sarmento hateten, liuhusi média ne’e hakarak konvida ema hotu hodi mai asiste jogu desportu entre nasaun CPLP nian.
“Jogo ne’e sei hahu iha loron 19 fulan ne’e no ita sei halo serimonia abertura, iha momentu ne’e mós sei hahu kedas bertura jogu futeból entre Timor-Leste hasoru Portugal, tanba ne’e liuhusi media, ha’u konvida ema hotu atu bele ba asiste jogu refere.” Dehan Ministeriu Juventude Desportu Arte no Kultura (MJDAK), Nelyo Isaac Sarmento, ba jornalista sira iha kampu futsal bebora, kuarta sexta-feira semana kotuk
Nia informa, familia sira ne’ebé hakarak ba akompaña jogu refere bele ba, tanba komisaun garante seguransa di’ak ba Timoroan sira ne’ebé hakarak ba asiste jogu.
“Tanba ne’e governu husu ba ita hotu atu mai akompaña, no suporta ita-nia ekipa nomos suporta membru pais sira ne’ebé mai jogu iha ne’e.” Informa Ministeriu Juventude Desportu Arte no Kultura (MJDAK), Nelyo Isaac Sarmento
Governante ne’e hatutan, nasaun ne’ebé sei to’o uluk iha Timor-Leste mak Guine Bissaun, parese loron 14 agora nia mak to’o uluk, restu ne’e sei to’o iha loron 17.
Nune’e jogu desportiva CPLP sei hahu iha loron 17-27 fulan ne’e, atu dehan katak loron 17 membru pais sira foin to’o iha Timor-Leste, no iha loron 18 komesa halo teknikal meeting, nune’e iha loron 19 hahu kompetisaun jogu.
“Aleinde kompetisaun ita mós iha seminar ba etika nian, forun juventude nian, nomos sei iha konferensia Ministru, maibé kada loron sei iha orariu kompetisaun ba modalidade sira.” Esplika Ministru Nelyo Isaac Sarmento
Jogu ne’e rasik sei partispa de’it husi nasaun hitu hanesan, Angola, Mosambique, Guine Bissau, Cabo Verde, São Tome e Prinsipe, Portugal no Timor-Leste, ho total atletas hamutuk 512 ne’ebé sei partisipa iha jogu refere.
Reportajen : Domingas
Foto : Media Officer MJDAK