Aileu, 22 jullu 2025 (Média Democracia) – Membru grupu viveirus kontente ho vizita husi Prezidente ADB hodi haree sira nia atividade produtu ne’ebé durante ne’e sira hala’o iha Munisipiu Aileu Suku Madabenu. Vizitasaun ne’e halo iha Munisipiu Aileu segunda feira semana ne’e.
Iha entrevista ho Membru Grupu Viveirus Kafe Suku Madabenu Aileu Cazimeira da Silva Granadeiro esplika, prosesu bibit kafe oan ne’e primeiru prepara rai metan asli no rai metan baibain, tau iha polibeck hodi bibit kafe oan sira, kafe oan ne’e bibit fulan ne’e foin kuda.
“Rai metan asli no rai metan baibain ne’e kahur hamutuk tiha depois mak ense ba poliback hodi bibit Kafe oan. Ida ne’e ami bibit uluk ne’e balun boot ho kiik hamutuk 1300 ho kategoria Kafe arabe de’it.” Dehan Membru Grupu Viveirus Kafe Suku Madabenu Aileu Cazimeira da Silva Granadeiro
Nia hatutan, Fini ba Kafe-oan ho ai-oan sira ne’e mai husi projetu CALIP iha Fatukeru, depois mak lori mai kuda iha ne’e.
“Ami iha grupu ne’e hamutuk 25, no ami agradese bele hetan formasaun husi ADB kona-ba oinsá bibit kafe-oan, oinsá prepara rai metan, no oinsa atu rega ai-aon ne’e, nune’e to’o agora ami sempre halo tuir saida mak ADB hanorin ona mai ami. Ami nafatin agradese ba ADB nia apoiu mai ami hanesan lona, makina dulas kafe no rede habai kafe, no balde boot.” Hatutan Cazimeira da Silva Granadeiro
Hatutan mós husi membru grupu Mandabenu Angela Castro hateten, grupu Viveirus Madabenu 2 ne’e kompostu ema na’in 25, grupu ne’e harii iha tinan 2022, hodi halo servisu kuda Kafe no Koileta kafe.
Husi membru 25 ne’e ida-idak iha nia toos, maibé kafe ne’e iha mudansa uitoan, tanba uluk kafe naruk sira kuu ladi’ak, maibé depois tesi halo badak tiha hafoin moris fali kafe ne’e badak no sira kuu ba di’ak.
“ha’u senti agora kafe ne’e nia fuan barak liu duke ida uluk sidauk tesi halo badak, tanba momentu ami koleita ne’e kafe nia fuan barak liu no nia hun ida bele kona to’o kilo 3. Bainhira ami koleita hotu depois habai maran lori ba tetu no kilo ida kona 3.00$ dolar, maibé kuando sira mak mai tetu direta iha ami nia uma ami hetan de’it kilo ida 2.50$, Karik kafe fuan seidauk maran tetu kona de’it 0.60 sentavu.” Dehan Mandabenu Angela Castro
Orgullu tebe-tebes hetan vizita husi Prezidente ADB liuliu mai to’o iha fatin ne’e, no sira husu ba ADB atu kontinua nafatin apoiu ba sira nia atividade liuhusi apoiu ekipamentu nomos liuhusi treinamentu sira kona-ba grupu atividade agrikultura nian atu nune’e sira bele hetan rendimentu hodi ajuda nesesidade familia nian.
Reportajen : Domingas
Foto : Domingas