Ainaro, 23 Jullu 2025 (Média Democracia) – Reprezentante Administrador Postu-Administrativu Maubisse Munisipiu Ainaro enkoraja joventude sira atu bele hadook-aan husi moras HIV-SIDA, tanba moras ne’e perigu tebes ba ema nia moris.
Tuir Reprezentante Administrador Postu-Administrativu Maubisse Munisipiu Ainaro, Helder de Orleans Soares afirma katak, husu ba estudan joven sira atu partisipa maximu iha formasaun ida ne’e hodi rona informasaun sira kona-ba Moras HIV-SIDA nian.
“Husu ba estudante no joven sira atu partisipa maximu iha Formasaun atu rona informasaun husi Institutu Nasional Kombate HIV-SIDA (INSCIDA) nomos parte saúde nian, tanba sira kontinua halo sensibilizasaun no dezamina informasaun sira ba komunidade no foinsa’e sira atu bele prevene-aan husi moras HIV-SIDA ne’e rasik, no moras ne’e hadaet husi relasaun sexual. Dadus ne’ebé agora iha ne’e hatudu katak Ainaro rejistu kazu ba moras HIV-SIDA hamutuk 39.” Dehan Reprezentante Administrador Postu-Administrativu Maubisse, Helder de Orleans iha Suku Horai kiik.
Nia salienta tan katak, husi formasaun no sensibilizasaun hirak ne’e bele aumenta tan koñesimentu sira nune’e labele monu ba moras aat sira, nomos husu nafatin ba joven sira tenki prevene-aan didi’ak tanba joven sira mak futuru nasaun ida ne’e.
Parte seluk tuir Autoridade Lokal Marcelino da Conceição Pires hateten, senti kontente tebes tanba parte husi Institutu Nasional Kombate HIV-SIDA bele mai halo sosializasaun iha Suku Horai kiik.
“Nu’udar Autoridade Lokal senti kontente tebes tanba ohin loron husi parte relevante sira hanesan INCSIDA bele mai to’o suku hodi bele fahe informasaun kona-ba moras HIV-SIDA, tanba ohin loron ema hotu preokupa ba moras refere. Tanba ne’e ba komunidade sira ne’ebé ohin la partisipa iha atividade refere, nu’udar Autoridade Lokal sei nafatin kontinua fahe informasaun ba foin sa’e sira atu bele hatene kona-ba transmisaun moras HIV-SIDA ne’e rasik.” Dehan Autoridade Lokal Marcelino da Conceição Pires iha Suku Horai kiik, Postu-Administrativu Maubisse Munisipiu Ainaro
Nia nafatin enkoraja Joventude sira atu partisipa Maximu hodi rona informasaun ne’ebé fahe husi parte relevante sira atu joven sira labele monu ba moras aat ne’e, tanba moras ne’e rasik bele hamate ema nia vida.
Tuir Prezidente Institutu Nasional Kombate HIV-SIDA (INSCIDA) informa katak, Moras HIV-SIDA ne’e sai hela dezafiu boot dezenvolvimetu nasional, tanba moras HIV-SIDA ne’e ameasa tebesba ema nia moris.
“Moras HIV-SIDA ne’e sai dezafiu boot ba ema nia moris, tanba ne’e iha Timor-Leste kazu ne’ebé Ministeriu Saúde (MS) fó sai Rihun rua-atus tolu-resin ona, se ida ne’e mak hadaet husi relasaun sexual Signifika kazu ne’e laos de’it Rihu-rua-atus tolu-resin, tanba sirkulasaun moras HIV-SIDA liuhusi relasaun sexual ne’e. Tanba ne’e tenki halo sensibilizasaun ba komunidade sira atu bele halo identifikasaun ba moras refere, nomos halo testu raan, tanba kuaze iha Timor-Leste ema ida HIV ne’e mak barak, SIDA ne’e oituan de’it. nune’e servisu makas hodi halo sensibilizasaun ba sosiedade sira oinsa atu bele prevene-aan husi moras refere.” Dehan Prezidente INSCIDA Daniel Marçal iha Suku Horai kiik, Postu-Administrativu Munisipiu Ainaro
Nia Esplika liután katak, halo sensibilizasaun mai iha Munisipiu Ainaro ne’e tanba iha identifikasaun moras HIV-SIDA hamutuk 39 itál ona ne’e signifika katak la’os 39 itál de’it, maibe barak los ona, tanba moras ne’e hada’et husi raan.
Reportajen : Tomas
Foto : Tomas