Dili, 24 Jullu 2025 (Média Democracia) – Asistensia Legal ba Feto no Labarik (ALFELA) realiza formasaun ho “tema ekuadramentu legal prevensaun no responde ba violensia kontra feto no labarik asesu ba sistema justisa formal ba estudante Departamento Direto iha Universidade Catolica Timorense (UCT), atividade ne’e hala’o iha UCT Balide Dili.
Diretora Asistensia Legal kona-ba Feto no Labarik (ALFELA) Marcelina M.F Amaral hateten, objetivu husi formasaun ne’e atu haforsa liután koñesimentu estudante sira nian kona-ba oinsá bele hatene sira-nia Direitu rasik bainhira infrenta problema ruma, nune’e bele asesu ba justisa.
“Objetivu husi formasaun ne’e bele haforsa liután koñesimentu estudante sira nian kona-ba oinsá sira bele hatene sira-nia direitu rasik karik sira hasoru problema ruma, nune’e sira bele asesu ba justisa. Aleinde sira bele halo komunikasaun entaun liuhusi formasaun ne’e atu reforsa liután kapasidade nu’udar akademia.” Dehan Diretora Asistensia Legal kona-ba Feto no Labarik (ALFELA) Marcelina M.F Amaral
Nia hatutan, relasiona ho teoria ne’ebé estudante sira hetan bele hatene di’ak liután kona-ba pratika ne’ebé ligasaun ho kazu Violénsia Bazeia ba Jeneru hanesan Ema ho Difisensia no LGBTIQ nune’e hotu iha direitu hanesan hodi asesu ba iha sistema justisa, husi Fulan Janeiru to’o Marsu ALFELA rejistú kazu hamutuk 146 maioria kazu violénsia domestika, violasaun sexual no abuzu sexual ba menóridade.
Iha sorin seluk reprezentante estudante husi Departamentu Direitu, Arnalo Izanio de Deus hateten, apresia tebes ho formasaun refere bele aprende liután baze legal sira kona-ba oinsá bele depende kona-ba direitu feto labarik no ema ho defisiensia durante ne’e infrenta ho kazu oioin.
“Ha’u kontente tebes tanba bele partisipa iha formasaun ida ne’e, bele aprende liután kona-ba baze legal sira kona-ba oinsá bele depende direitu feto no labarik ema diversidade ema ho defisiensia sira.” Dehan Reprezentante Estudante Departamentu Direitu, Arnalo Izanio de Deus
Estudante ne’e relata husi formasaun ne’e partisipante sei aprende kona-ba lei no konseitu jeral, oinsá bele depende feto no labarik diversidade defisiensia nian, nune’e hodi hetan asesu iha justisa formal.
Esplika liután komesa iha Fulan tolu tinan ida ne’e ALFELA rejistu kazu hamutuk atus-ida haatnulu resin-neen (146). Maibé kazu maioria liu mak violénsia domestika no kazu violasaun abuzu sexual ba menoridade, ba kazu hanesan vitima ba ema defisiensia nomos vitima feto no labarik sira. Dadus jeral ALFELA rejista husi Fulan Janeiru to’o fulan Jullu kazu hamutuk 500, kazu maioria submete ona ba Minísteriu Publikú no Tribunal husi kazu refere 51 mak remata ona dezisaun.
Reportajen : Nelfiano
Foto : Nelfiano