Ainaro, 25 Jullu 2025 (Média Democracia) – Estrada Maubisse Vila liga ba Suku Fatubessi sei aat hela, no durante ne’e programa PNDS nian mak toma konta ba Estrada refere, maibé tanba orsamentu PNDS nian la to’o, nune’e estrada refere seidauk halo hotu.
Tuir Autoridade Lokal Suku Fatubessi Postu-Administartivu Maubisse Munisípiu Ainaro Programa PNDS hahu ona iha mandatu iha tinan 2015, ohin loron husi PNDS kontinua nahe rabat estrada ne’e, tanba dalan ne’e importante tebes hodi rezolve transporta lao ba mai ho di’ak.
“Estrada ne’e importante tebes tanba kuandu ha’u eleitu ba Xefe Suku iha tinan 2016, Planu ha’u nian primeiru mak Estrada, tanba iha Suku Fatubessi estrada kuaze aat, ho nune’e mak ita haree ba orsamentu PNDS nian ne’ebé koloka mai kada Suku rihun limanulu, nune’e ami foti desizaun hodi hadia Estrada.” Dehan Xefe Suku Fatubessi Bonifacio Pereira Mendonça iha Suku Fatubessi
Nia hatutan liután katak, iha Mandatu 2016 nafatin kontinua PNDS nia programa atu hadia nafatin estrada liga husi Maubisse villa mai iha Suku Fatubessi, nune’e komunidade sira bele lori sira nia produtu lokal ba merkadu.
“Iha tempu UNAMET nian mak husi Forsa Portugal mai loke dalan ne’e liga ho Aldeia Aihosa Suku Maulau nian. Depois ho ida ne’e lao kontinua programa PNDS nian no seidauk iha Konstrusaun foun ida.” Hatutan Xefe Suku Fatubessi Bonifacio Pereira Mendonça iha Suku Fatubessi
Nia informa tan katak PNDS nia programa ne’e hahu iha tinan 2015 to’o 2025. Iha tinan 2019 haruka ona proposta ba iha Ministeriu Obras Publika, no proposta ne’e sira rasik halo survei ona total, kilo neen metru atus-hitu, nune’e proposta nafatin submete ba Planu Intergradu maibé iha hela Ministeriu obras Publiku atu haree ba oin no governu bele foti ona proposta refere.
Parte seluk tuir reprezentante Administrador Postu-Administartivu Maubisse Munisípiu Ainaro, Helder de Orleans Soares hateten, iha Suku Fatubessi uluk estrada ladun di’ak, ho prezensa Programa PNDS nian maske seidauk 100% maibé bele koresponde ona povu sira nia moris.
“Husi Programa PNDS nian bele koresponde ona komunidade sira-nia ejizensia hodi sira bele lori ona sira-nia produtu ba iha Merkadu Lokal. Estrada halo ona balun hodi hatan ba komunidade sira-nia preokupasaun maske seidauk tama ba 100%, tanba iha Suku ne’e rasik iha area potensial sira hanesan liga ba Hortikultura liis moto, kafe no sira seluk, nomos iha rekursu natural seluk hanesan rai-henek.” Dehan Reprezentante AdministradorPostu-Administrativu Maubisse Helder de Orleans soares iha Suku Fatubessi.
Nia hatutan, liuhusi programa PNDS nian bele ona koresponde komunidade nia nesesidade sira maibé iha parte balun mós seidauk koresponde haree husi faze ba faze. Espera katak iha tempu ruma ho orsamentu ne’e neneik no ba bebeik sei halo konstrusaun di’ak liutan. Tanba Prosesu Dezenvolvimetu la marka pazu, maibé tuir kondisaun kapasitas finanseiru ne’ebé iha.
Reportajen : Tomas
Foto : Tomas