Dili, 26 Agostu 2025 (Média Democracia) – Komandante Polisia Nasional Timor-Leste liuhusi komisaun organizador rekrutamentu ba Kadetes PNTL 2025 relata progressu ba submete formulariu kadetes foun no regulamentu ba tuir teste Kadetes PNTL tinan 2025 nian.
Komandante PNTL hanesan mós porta-voz ba rekrutamento Kadetes PNTL tinan 2025 Antonio da Luz dehan, iha loron ida ne’e Sekretariu no ekipa sira sei fó sai ba publiku relasiona ho kandidatu sira ne’ebé simu formulario nomos sira ne’ebé entrega ona sira nia dokumentu ba iha Munisipiu ida-idak.
“Ba kandidatu sira ne’ebé simu formulariu hahu husi loron 5 fulan agostu to’o mai iha loron 25 fulan agostu hamutuk 17.148, dadus ne’e ba sira ne’e liu ona iha admisaun, no sira ne’ebé laliu hamutuk 4.772. Liuhusi total hirak ne’e sira ne’ebé submete fila-fali dokumentu ba komisaun pontu fokal kada Munisipiu idaidak nian hamutuk 4.428. Iha ne’e ita fahe ba iha kategoria hanesan Jeral nian kadetes hamutuk 3.037 kompostu husi mane 2.254 no feto 783, Kadetes ne’ebé mai ho jerasaun patriota hamutuk atus-ualu tolunulu resin-lima 835 kompostu husi mane 645 no feto 190, nomos oan husi PNTL nian hamutuk atus-lima limanulu resin-neen 556 kompostu husi mane 396 no feto 160.” Dehan Komandante PNTL hanesan mós porta-voz ba rekrutamento Kadetes PNTL tinan 2025 Antonio da Luz
Numeru ne’ebé submete ona dokumentu ba iha pontu fokal Munisipiu idaidak inklui mós polisia akademik Dili nian hamutuk 428 maka submete ona dokumentu. Aproveita oportunidade ida ne’e atu fó hatene ba kandidatu sira depois submete hotu dokumentu ba iha pontu fokal sira to’o iha loron 9 fulan setembru no iha loron 10 fulan setembru tinan 2025 pontu fokal sira sei lori dokumentu mai hodi entrega iha Sekretariadu atu halo verifikasaun ba iha dokumentu.
Nia salient, husi dokumentu ne’ebé lori husi pontu fokal Munisipiu mai Sekretariadu sei hala’o verifikasaun no sei taka sai fila-fali naran, se maka pasa iha selesaun dokumentu no se maka la pasa iha selesaun dokumentu. Nune’e sira ne’ebé liu iha selesaun dokumentus sei kontinua prepara-an ba fali iha prova eskrita, iha prosesu prova eskrita ne’e kada kadetes tenke prepara ninian ekipamentu/material sira hanesan tuir mai, Lapis tenke marka 2B, Apagador, Regua, nomos Afiador, kandidatu ida-idak tenke prepara rasik nian ekipamentu antes prova, tanba iha prosesu teste eskrita nian sei halo selesaun tuir sistema ninian modelu hanesan ezame nasional bainhira ezame hotu sistema maka sei halo selesaun ba resultadu teste eskrita nian.
Nia reafirma, kandidatu sira ne’ebé pasa ona iha selesaun teste eskrita, sei kontinua teste fiziku ne’ebé hala’o iha idaidak nia Munispiu. hafoin teste fiziku hotu se mak liu sei kontinua teste ba iha Psico teste, depois kontinua entrevista, no teste ikus liu maka saude.
Reportajen ; Domingas
Foto : Domingas