Dili, 27 Agostu 2025 (Média Democracia) – Eis-Primeiru Ministru no Sekretariu Jeral Partido Fretelin Mari Alkatiri iha nia deklarasaun katak Governu abandona sistema saneamentu baziku no saude hodi afeta ba setor turismu iha rai laran.
Sekretariu Jeral Partidu FRETILIN Mari Alkatiri hateten, Setor turismu iha rai laran la lao, tanba governu seidauk rezolve problema saneamentu baziku sira hanesan be’e mós, estrada, eletrisidade no saude iha rai laran.
“Ha’u atu dehan deit katak ita seidauk rezolve problema saneamentu baziku ne’ebé agora dadauk ita-nia komunidade sira enfrenta hanesan be’e mós, sistema saude, nune’e turista sira mai karik buat pereparadu hotu ona.” Sekretariu Jeral Partidu FRETILIN Mari Alkatiri
Nia hatutan, bainhira fasilidade saneamentu baziku hirak ne’e governu seidauk bele rezolve, nune’e sai problema boot ba ita liuliu turista sira ne’ebé atu mai vizita Timor-Leste.
“Se turista sira ne’e atu mai Timor-Leste sira hakarak ba vizita fatin Turismu sira, ita atu lori sira ba ne’ebé, bainhira sira moras derepente ita atu lori ba iha fatin ne’ebé, ita-nia fatin turismu de’it menus fasilidade, entaun hanoin katak ida ne’e presiza resolve ka hala’o servisu lai atu nune’e bele dezenvolve di’ak liu.” Hatutan Sekretariu Jeral Partidu FRETILIN Mari Alkatiri
Mari Alkatiri afirma, Lideransa ba setor turismu dadaun ne’e barak liu hala’o viajen ba rai liur no organiza eventu boot sira, maibé nafatin abandona setor turismu iha rai laran.
“Ha’u husu ba Vise-Primeiru Ministru atu bele haree ba dezenvolvimentu Turismu rai laran tanba ita hotu hatene katak turista sira mai ne’e atu vizita fatin turismu iha Timor-Leste liuliu fatin turismu Kristu Rei, Aleinde ne’e mós husu nafatin ba Ministeiru Turismu atu labele abandona fatin Turismu sira iha Timor laran.” Afirma Sekretariu Jeral Partidu FRETILIN
Sekretariu Jeral Partidu FRETILIN ne’e mós preokupa tebes ba Governu ne’ebé gasta osan barak ona, maibé ekonomia rai laran menus liuliu turismu rai laran, nomo setor seluk ne’e seidauk lao tuir povu nia hakarak hanesan be’e moos, Estrada, eletrisidade no saude.
“Se ita haree estrada boot maibé be’e mós ba povu laiha, signifika kata povu nia ekonomia mós sei la iha. Iha fali parte saude nian mós agora aimoruk atu salva povu menus ka laiha, maske Doutor no espesialista barak, haree fali ba ekipamentu diagnostika ne’ebé atu halo tratamentu mós la adekuadu, maibé ita gasta ona osan to’o 26 to’o 27 mil milhoes husi fundu minarais, ne’e laos oituan.” Subliña Sekretariu Jeral Partidu FRETILIN Mari Alkatiri
Nia reafirma, selebrasaun ba loron 30 fulan agostu tinan ida ne’e konsulta popular agora sei selebra ba tinan ruanulu resin neen ona (26 anos de referendu) mais governu gasta osan makas tebes, maibé dezenvolvimentu ne’e to’o iha ne’ebé ona.
Reportajen : Domingas
Foto : Domingas