Dili, 29 Agostu 2025 (Média Democracia) – Sekretariu Estadu Formasaun Profisionál no Empregu (SEFOPE) liuhusi Diresaun Nasionál Empregu no Estranjeiru DNEE sei haruka traballadór Timoroan na’in 33 ba Korea do Sul.
Diretora Jerál Interina SEFOPE, Clementina Araújo de Almeida hateten, ohin asina akordu traballadór hamutuk ho familia nune’e iha loron 1 fulan setembru ajénsia ne’e hala’o serimónia despedida ne’ebé marka ho asina akordu entre Governu no traballadór kontratadu sira.
“Iha oportunidade ida ne’e ha’u atu husu ba traballadór sira hotu atu hatudu komportamentu no atetude ne’ebé di’ak atu nune’e Governu Korea sei fó nafatin oportunidade ba kolega sira iha futuru bainhira la hatudu hahalok ne’ebé la di’ak entaun Governu Korea sei la bolu tan atu servisu.” Dehan Diretóra Jerál Interina SEFOPE, Clementina Araújo de Almeida
Diretora Interina SEFOPE hatutan, bainhira hanesan traballadór ba servisu ona iha rai liur, lalika baruk hanesan sei iha Timor-Leste. Tanba iha Korea ema tenke hatudu hahalok no disiplina badinas servisu tuir oras servisu nian.
“Ami nia traballadór ne’ebé iha loron 1 fulan setembru sei ba servisu iha Korea hamutuk ema nain (33) iha área oin tolu hanesan iha setor peska, fabrika nomos industria.” Hatutan Diretóra Interina SEFOPE
Nia akresenta tan katak husi traballadór sira ne’e nain 27 maka traballadór foun no traballadór antigu na’in 6 hetan kontratu foun husi sira-nia empreza.
Iha fatin hanesan reprezentante traballadór Adriano Xavier hateten, sente orgullu tebes tanba hetan oportunidade ida ne’e hodi ba servisu iha Korea Sul, nune’e iha futuru bele hadia moris nomos suporta alin sira ba estudu.
“Ha’u atu hato’o agradesimentu ba Governu Timor-Leste ne’ebé esforsu iha kolaborasaun ho Governu Korea hodi fó empregu. Bainhira ha’u servisu iha Korea, ha’u hakarak hadi’a ha’u nia ekonomia família nomos ha’u suporta ha’u nia maun-alin sira ne’ebé hakarak estuda.” Dehan Reprezentante Traballadór, Adriano Xavier
Nia hatutan, iha oportunidade ida ne’e hakarak husu ba Governu Timor-Leste no Governu Korea nafatin halo kooperasaun di’ak nune’e haruka joven ba servisu iha rai liur hodi muda familia nia moris inklui hatama osan mai Timor-Leste no kria mós dezenvolvimentu iha rai laran.
Esplika liután atividade ne’e realiza husi Sekretáriu Estadu Formasaun Profisional liuhusi Diresaun Nasionál Empregu no Estranjeiru asina akordu hamutuk ho familia traballadór nune’e iha loron 01 Fulan Setembru sei aranka ba servisu iha Korea do Sul iha area tolu hanesan peska, fabrika nomos industria.
Reportajen : Nelfiano
Foto : Nelfiano