Dili, 02 Setembru 2025 (Média Democracia) – Universidade da Paz realiza konferensia imprensa dirije ba nonu governu konstitusional ne’ebé ligadu ho desızaun politika infantil ne’ebé produz iha Parlamentu Nasional nu’udar 2º orgaun soberania no Deputadu sira ne’ebé reprezenta povu iha uma fukun Parlamentu Nasional. Konferensia ne’e hala’o iha Segunda semana ne’e.
Porta-voz Theo Salsinha hateten, relasiona ho konferensia imprensa ida ne’e Universidade da Paz nia posisaun hodi kontra no la konkorda total ho desisaun politika infantil no prematur husi Deputadu sıra iha uma fukun Parlamento Nasional hakarak sosa viatura foun 65 ho marka PRADO no sei utiliza orsamentu geral Estadu ho montante $ 4.2 miliaun, nune’e mak Universidade da Paz konsidera desizaun politika ne’ebé Parlamentu Nasional deside la nesesario ho razaun.
“La presiza atu sosa tan kareta luxu ba Deputadu sira, tanba kareta ne’ebé dadaun ne’e Deputadu sira utiliza ho kondisaun sei permite hela, no laiha indikasaun ruma katak kareta hirak ne’e avaria ona. Deputadu sıra hetan tiha ona kareta ho marka prado iklui laptop MAC nomos direitu ba regalias oioin hanesan, Subsidio ba alojamentu, subsidiu ba Tratamentu, subsidiu ba eletrisidade, etc.” Dehan porta-vóz, Theo Salsinha
Porta-voz hatutan, labele gastu arbiru orsamentu geral do estado hodi fó previleziu ba Deputadu sira, tanba kultura a’at ida ne’e la fó benefisiu ba povu, maibé investe ba iha setor produtivu sira ne’ebé bele fó rendimentu ba estadu inklui kria kampu traballu ba joven Timoroan, tanba iha dadus katak Timor-Leste iha dezempregu porsento 5,1% inklui mal nutrisaun aas 47,1%. Tanba ne’e Universidade da Paz afirma katak la nesesariu atu sosa karreta ba Deputadu sira.
“Universidade da paz husu ba Parlamento Nasional atu uza orsamentu ne’ebé iha hodi halo dezemvolvimentu ba infraestrutura bazika hanesan estrada bee moos inklui eletrisidade ba suku no aldeia sira ne’ebé seidauk asesu.” Hatutan porta-vóz, Theo Salsinha
Porta-voz informa, Universidade da Paz konsidera desizaun politika ne’ebé Parlamentu Nasional deside, nu’udar aktu korrupsaun legal, tanba sıra rasik halo lei no sıra rasik aprova hodi uza osan povu nian ba sira nia intrese.
“Bazeia ba preokupasaun sira ne’ebé temi liubá maka Universidade da Paz hakarak rekomenda ba parlamentu. Husu ba Sua Exelensia Primeiro Ministru nu’udar Xefe Governu presiza kaer prinsipiu interdependensi institusional fó atensaun ba Parlamentu Nasional imediatamente kansela desizaun sosa prado ba deputadu sira.” Informa porta-vóz, Theo Salsinha
Nia afirma husu ba Presidente Parlamento Nasional no Deputado sira atu resolve uluk kondisaun no situasaun real povo nian antes deside imi nia interese ne’ebé demasiadu tebes. Husu ba Parlamento Nasional atu hapara kultura sosa, tanba la’os kareta mak sai razaun ba Deputadu sira nia funsionamentu.
Esplika liután responsabilidade lolos nu’udar reprezentante povu iha uma fukun Parlamentu Nasional laos ho pensamentu kareta luxu no direitu ba reagias oioin.
Reportajen : Nelfiano
Foto : Nelfiano