Dili, 04 Setembru 2025 (Média Democracia) – Diretor Ezekutivu Luta Hamutuk Jose Alves da Costa husu povu no veteranus sira atu labele nonok ba politika Parlamentu Nasional nian bainhira nafatin atu sosa kareta prado ba sira nia an-rasik.
Nia dehan, apresia ba sosiedade sivil, kolega estudante sira ne’ebé halo ona komunikadu imprensa ona hodi kontra politika Parlamentu Nasional nian hodi sosa kareta prado foun hamutuk neennulu resin-lima ba sira nia-an, husi parte luta hamutuk nian hanoin hanesan ho estudante sira kontra desizaun politika ne’ebé Parlamentu Nasional sira halo.
“Ita kontra desizaun politika husi Parlamentu Nasional, tanba foin iha tinan 2023 ne’e Parlamentu Nasional foin sosa kareta foun hamutuk tolunulu no agora daudaun sira uza hela kareta iha Parlamentu no kareta pajero sira ne’ebé sosa uluk ne’e balun halo lelaun no balun hatama fila-fali, husi parte Luta Hamutuk nia hanoin katak la nesesariu atu sosa tan kareta foun tanba iha nesesidade lubuk ne’ebé sei sai hela problema boot ba iha ita-nia sosiedade, barak maka sei hasoru hela problema ba iha sira-nia asesimentu ba iha estrada, bee moos, edukasaun, saude, agrikultura, nune’e presija duni governu nia atensaun, laos ba sosa maka kareta prado.” Dehan Diretor Ezekutivu Luta Hamutuk Jose Alves da Costa
Nia hatutan, tanba saida maka tenke rezeita atu sosa kareta foun ba Deputadu sira iha tinan ida ne’e tanba to’o agora komunidade hotu seidauk asiste ka haree ho matan katak Deputadu ida ba halo fiskalizasaun iha Munisipiu ka iha area rural sira.
“Ita la konkorda sosa kareta foun tanba osan ba manutensaun rutina ba kareta ne’e mós iha maibé durante ne’e Deputadu ida ne’ebé ba ona fiskalizasaun iha Munisipiu sira tur muron hela iha Parlamentu ne’eba, foin lalais ha’u ba Munispiu Baucau Postu Venelale husu administrador fó lista ba ha’u haree lista ne’e la iha Deputadu ida mak ba halo fiskalizasaun iha projetu sira ne’ebé implementa iha ne’eba.” Hatutan Diretor Ezekutivu Luta Hamutuk Jose Alves da Costa
Esplika kle’an liután katak, Sosiedade Sivil, Estudante no povo balun la satisfas ho politika Parlamentu Nasional nian ne’ebé hola kareta prado foun, tanba povo barak sei halerik ba Bee Moos, Eletrisidade, Estrada A’at, Saude ne’ebé aimoruk la sufisiente.
Reportajen : Domingas
Foto : Domingas