Dili, 05 Setembru 2025 (Média Democracia) – Seguransa Ministeriu Interior Superintendente Polísia partilla Informasaun kona-ba Seguransa ne’ebé akontese durante Periodu semana rua nia laran hahu husi loron 18 to’o loron 31 fulan Agustus tinan 2025 ba Públiku iha Timor-Leste, Konferensia ne’e Média Democracia asesu husi pajina PNTL, Sexta Semana ne’e.
Porta-voz Seguransa Ministeriu Interior Superintendente Polísia, João Belo dos Reis informa liuhusi Konferensia Imprensa ne’e ho objetivu atu partilla informasaun ho Transparansia, Akuntabilidade no Responsabilidade Institusional kona-ba servisu sira ne’ebé Ministeriu Interior no Komandu Polísia Nasional Timor-Leste (PNTL) halo.
“Durante Periodu refere, Kazu Krime ne’ebé rezista iha Sistema Jestaun Insidente ka Incident Management System (IMS) hahu husi Nasional, Munisípiu no Postu hamutuk 123 Kazu ho tipu kazu lima (5) hanesan Violénsia Domestika durante periodu loron 18-31 fulan Agustus hamutuk 49, Asaltu Malu hamutuk 36, Furto/Naok hamutuk 7, Asaltu Seksual totál kazu 5 no Ameasa ho total kazu 4.” Dehan portavóz Seguransa Ministeriu Interior Superintendente Polísia, João Belo dos Reis
Superintendente Polisia hatutan, semana rua nia laran PNTL responde ba Krime bo’ot tolu (3) hanesan Kazu Oho Malu iha Munisipiu Ermera, Kazu Oho Malu iha Munisipiu Baucau no Kazu Tiru Sidadaun Indonesia no membru UPF na’in tolu (3) kanek iha Rejiaun Administrativu Oecusse. Husi kazu sira ne’e hotu, PNTL liuhusi Investigasaun Kriminal aprezenta ona Autos ba Ministeriu Públikua (MP) iha Munisipiu idak-idak.
Entertantu iha kapital Dili, sei konsidera produz kazu barak liu kompara ho Munisipiu sira seluk ho total kazu hamutuk 80 no Violensia Domestika mós konsidera Dili akontese kazu ass liu ho total kazu hamutuk 24.
“Dadus asidente ne’ebé Tranzitu rekolla asidente Rodoviaria akontese durante periodu semana rua nia laran (18-31 Agustus) hamutuk 81, husi total asidente ne’e rezulta vitima kanek kama’an hamutuk 97, kanek grave hamutuk 11 no mate ka lakon vida hamutuk 3, nafatin Munisipiu Dili produz asidente barak liu kompara ho Munisipiu sira seluk ho total asidente 18 durante loron 14 nia laran.” Informa Porta-voz Superintendente Polísia
Superintendente Polísia ne’e haktur mós kona-ba Dadus Infrasaun Tránzitu no Multa ne’ebé konsege detekta durante semana rua nia laran maka hanesan Transporte Governu hamutuk 3, Transporte Privadu total 369 no Transporte Públiku hamutuk 23.
“Ho ninia tipu infrasaun ne’ebé komete barak liuhusi infrator sira hanesan laiha dokumentu hamutuk 85, La uza Kapasete 85, Kontra Ordem Autoridade 102, Kontra Sinais Tránzitu 43 no La Monta Xapa Matríkula hamutuk 9.” Afirma Porta-voz
Porta-vos relata reseita husi infrasaun Tranzitu no sirkulasaun transporte estranjeiru husi Fiskalizasaun no Operasaun rutina ne’ebé Polísia Tránzitu halo hodi kontrola movimentu transporte iha viasaun públiku, semana kotuk remata Reseitas ba Kaixa Estadu hamutuk US$ 14.541.00 no semana ne’e rekolla Taza husi Infrasaun hamutuk US$ 15.424.00 ba Kofre Estadu.
Esplika liután transporte Estrageiru Pesadu no Lizeiru ne’ebé tama iha Teritoriu Timor-Leste, Polísia Tránzitu iha Postu Integradu sira, rekolla mós Reseitas husi movimentu transporte sira ne’e tama no sai iha liña Fronteira hanesan Postu Fronteira Batugade total reseitas US$ 4.783.00, Postu Fronteira Salele US$ 2.400.00, Postu Fronteira Sakato US$ 1.279.00, Postu Fronteira Oesilo US$ 83.00 ho total hamutuk US$ 8.545.00.
Reportajen : Nelfiano
Foto : Media PNTL