Dili, 9 Setembru 2025 (Média Democracia) – Sekretariadu Estadu Formasaun Profisional No Empregu Sefope liuhusi Diresaun Nasional Empregu Estranjeiru anunsia rejistrasaun vaga online nova zelândia ho Programa “Empregador Sazonal Rekoñesidu (Recognised Seasonal Employer – RSE)” data inskrisaun hahu husi loron 8 to’o loron 12 fulan setembru tinan 2025.
Liuhusi komunikadu ne’ebé hato’o husi Diretor Nasional no Empregu Estranjeiru João Coreia Pereira, Programa ida-ne’e estabelese atu fó apoiu ba nesesidade traballador sazonal sira iha indústria “Ortikultura” no “Vitikultura” Nova Zelândia nian, enkuantu fornese mós oportunidade empregu temporáriu ba traballadór síra husi nasaun parseiru illa Pasifiku sira no mós Timor-Leste.
“Ami enkoraja tebes ita-boot sira atu le’e didi’ak informasaun no rekizitu sira hotu molok ita-boot sira atu hahu aplikasaun, nune’e sei ajuda asegura katak ita-boot komprende kritériu elejibilidade nian.” Dehan Diretor Nasional no Empregu Estranjeiru João Coreia Pereira
Nia informa, Períodu Aplikasaun sira ba Programa RSE sei loke husi loron 8 to’o loron 12 fulan-Setembru, 2025 nia laran. Husu atu aplikante sira atu asegura katak aplikasaun no dokumentu sira hotu ne’ebé presiza hatama iha prazu ida-ne’e nia laran no durasaun tempu ne’ebé termina ona.
“Kondisaun importante sira ne’ebe aplikante sira presiza komprende uluk bainhira aplikasaun Online Programa RSE. Ida nasionalidade, tenki sidadaun Timor-Leste. Rua idade, aplikante sira tenki 21 ba leten. Tolu profisiénsia inglés, Ita-bo’ot tenki iha lisensiatura/Diploma Inglés ka sertifikadu lian inglés.” Informa Diretor Nasional no Empregu Estranjeiru João Coreia Pereira
Nia hatutan, durasaun empregu, Empregu tuir Programa RSE ho nia durasaun ba fulan 6-7. hafoin kompleta periodu ida-ne’e, traballador sira tenki fila mai Timor-Leste maizumenus durante fulan 4 molok elizivel ba kontratu seluk (mobilizasaun tuir mai).
“Haree ba iha kondisaun servisu nian, Servisu limita ho tipu oin rua hanesan “ortikultura no virtikultura” deit la iha tipu empregu seluk ne’ebé permite tuir vistu RSE nian. Oras servisu Minimu 30 iha kada semana, ka oras 30 média kada semana durante semana haat (oras 120 kada fulan). Klima, Prepara-an ba temperatura oioin, husi besik 7°C iha tempu invernu (Jullu) to’o besik 34°C iha tempu veraun. Remunerasaun, Taxa saláriu atual ba traballador RSE sira-nia minimu maka NZD $23.15 kada oras.” Hatutan Diretor Nasional no Empregu Estranjeiru João Coreia Pereira
Diretor informa, Ezijénsia Fiziku sira hanesan traballador/a tenki bele foti no lori ai-fuan no modo sira ne’ebé todan. Envolve servisu repetitiva sira hanesan dobrada/hakruuk, hili/ku’u, no tesi/koa. Presiza nivel kondisaun fiziku neʼebé di’ak (saudavel) atu bele hala’o ezijensia sira nian serbisu ne’e.
“Dokumentu sira ne’ebé presiza (Rekizitus) hanesan, Dokumentu hotu-hotu tenki submete (upload) ho versaun dokumentu iha PDF no koloridu, Ita-bo’ot nia pasaporte tenki validu pelumenus fulan ne’en ba leten. Sertifikadu rejistu kiriminal neʼebé validu (ho versaun lian inglés). Sertifikadu lian inglés/Diploma. Kartaun evidensia husi SEFOPE. Billete identidade (BI). Kartaun eleitoral (KE). Sertifikadu vasinasaun COVID-19. Sertidaun RDTL (Birth Certificate). Foto perfil pompletu (whole body seluruh badan). Opsionál, bele mós submete/upload kartaun lisensa kondusaun kareta nian (ho kategoria B1/B2-C1/C2.J neʼebé válidu hanesan identifikasaun adisional.” Informa Diretor Nasional no Empregu Estranjeiru João Coreia Pereira
Aplikasaun ba Eskema RSE Online ba hirak ne’ebé seidauk iha sistema, bele kompleta no submete fila-fali aplikante sira nia dokumentu ba iha link ne’ebé iha ona pagina facebook Sefope nian tuir loron ne’ebé determina ona. Se aplikante balun rejista ona iha sistema PALM nian, labele rejista online ba Programa RSE ne’e, tanba aplikante refere nia profile sira rejista ona iha sistema PALM (IRD System), no bainhira aplikante ne’e registu nafatin iha RSE nian sistema sei la simu ka hetan rejeitasaun.
“Ami enkoraja no husu ita-bo’ot sira iha vontade atu registu mós iha programa RSE no bele haruka mós karta espresaun interese ida liuhusi email ne’ebé Sefope ativu ona no husu atu pasiensia no koko fila-fali, bainhira halo rejistrasaun online ba iha Sistema programa RSE, link ne’ebé ita-bo’ot sira asesu iha problema ne’e lao neneik (loading hela) ho razaun slot ba aplikasaun refere iha nia limitasaun ba asesu nian. Deklarasaun bainhira ita-boot atu aplika ba vaga ne’e ita-bo’ot tenke konfirma katak ita-bo’ot le’e, komprende, no konkorda ona ho kondisaun no rekizitu sira hotu ne’ebé mensiona iha leten, Ita-bo’ot mós rekoñese katak fallansu atu kumpre kritériu sira-ne’e ka atu fornese dokumentu sira neʼebé presiza sei rezulta iha rejeitasaun imediata ba ita-bo’ot nia aplikasaun refere.” Subliña Diretor Nasional no Empregu Estranjeiru João Coreia Pereira
SEFOPE liuhusi Diresaun Nasional Empregu Estranjéiru, sei la halo atendimentu ba rejistu manual. Aplikasaun hotu-hotu tenki halo ho online ka liuhusi email no link ne’ebé mensiona ona iha leten.
Reportajen : Domingas
Foto : Domingas